कोशी प्रदेशमा धान रोपाइँको प्रगतिः साउन १८ सम्म ८९.०३ प्रतिशत

साउन १८, सोलुखुम्बु । कोशी प्रदेशमा यस वर्ष साउन १८ गतेसम्ममा ८९.०३ प्रतिशत धान रोपाइँ सम्पन्न भएको छ । प्रदेश सरकारको उद्योग, कृषि तथा सहकारी मन्त्रालयले सार्वजनिक गरेको तथ्याङ्कअनुसार गत वर्षको सोही अवधिको तुलनामा यो वर्ष धान रोपाइँ करिब ६ प्रतिशतले पछाडि परेको हो ।

गत वर्ष यसै अवधिमा ९५.०१ प्रतिशत धान रोपाई सम्पन्न भएको थियो । प्रदेशको कुल धान खेती हुने २ लाख ७६ हजार ३८६ हेक्टर क्षेत्रफलमध्ये हालसम्म २ लाख ४६ हजार ६५ हेक्टरमा रोपाइँ सकिएको छ । झापा, मोरङ र सुनसरी जिल्ला समावेश तराई क्षेत्रमा औसत ९१.७६ प्रतिशत रोपाइँ भएको छ । त्यसैगरी, मध्य पहाडी जिल्लाहरूमा ८४.२२ प्रतिशत र उच्च पहाडी जिल्लाहरूमा ७५.९४ प्रतिशत रोपाइँ भएको मन्त्रालयले जनाएको छ ।

जिल्लागत तथ्याङ्क हेर्दा सोलुखुम्बुमा ९४ दशमलव ६९ प्रतिशत र ओखलढुङ्गा जिल्लामा शतप्रतिशत धान रोपाइँ सम्पन्न भएको छ । यस्तै सुनसरीमा ९५ प्रतिशत, मोरङमा ९२ प्रतिशत र झापामा ८९.४७ प्रतिशत धान रोपाइँ भएको छ । सबैभन्दा कम रोपाइँ भने तेह्रथुम जिल्लामा भएको छ । उक्त जिल्लामा ६६ प्रतिशत मात्र रोपाइँ सकिएको छ । त्यसैगरी ताप्लेजुङमा ७३.२९ प्रतिशत, भोजपुरमा ८० प्रतिशत र पाँचथरमा ८२ प्रतिशत रोपाइँ भएको तथ्याङ्कमा उल्लेख गरिएको छ ।