उदयपुरमा ट्रकले थिच्दा गोठालाको मृत्यु

साउन २०, सोलुखुम्बु । उदयपुरको उदयपुरगढी गाउँपालिका– ७ मदन भण्डारी मार्गस्थित जोगीपोखरीमा ट्रक दुर्घटना हुँदा एकजनाको मृत्यु भएको छ। उदयपुर रौतामाई–७ का ७२ वर्षीय टङ्कबहादुर लामिछाने मगरको भएको हो। काठमाडौँबाट सुनसरीतर्फ जाँदै गरेको प्रदेश ३–०१००– ६ ख ०५६१ नम्बरको ट्रक सोमबार साँझ दुर्घटना हुँदा मगरलाई थिचेको थियो। उनी बस्तु चराएर घर फर्किँदै थिए।

घटनास्थलमै उनको मत्र्यु भएको जिल्ला प्रहरी कार्यालयका सूचना अधिकारी केदारमान दोङले जानकारी दिनुभयो । दुर्घटनामा ट्रकका सहचालक दोलखा कालिञ्चोक गाउँपालिका– ४ का ४० वर्षीय गोमे दर्जी घाइते भएका छन्। उनको जिल्ला अस्पतालमा उपचार भइरहेको छ । प्रहरीले ट्रक चालक काभ्रेपलाञ्चोक बनेपा नगरपालिका– १४ का ५४ वर्षीय नवराज राउतलाई नियन्त्रणमा लिएको छ।