सोलुखुम्बुमा ९४ दशमलव ६९ प्रतिशत धान रोपाई सकियो

साउन २०, सोलुखुम्बु । हिमाली जिल्ला सोलुखुम्बुमा ९४ दशमलव ६९ प्रतिशत धान रोपाई सकिएको छ । कुल १ हजार २ सय २५ हेक्टर धान खेतीयोग्य जमिनमध्ये १ हजार १ सय ६० हेक्टरमा धान रोपिएको हो । साउन १८ गतेसम्मको तथ्याङ्कअनुसार जिल्लामा धान रोपाईको कार्य सुस्त गतिमा अघि बढिरहेको कृषि ज्ञान केन्द्र सोलुखुम्बुका सूचना अधिकारी उपेन्द्र ठाकुरले जानकारी दिनुभयो ।

उहाँका अनुसार सोलुखुम्बुका अन्य तीन स्थानीय तह, सोलुदुधकुण्ड नगरपालिका, थुलुङ दुधकोशी गाउँपालिका र महाकुलुङ गाउँपालिकामा भने शतप्रतिशत धान रोपाई सम्पन्न भइसकेको छ । यसैगरी, नेचासल्यान गाउँपालिकामा ९० प्रतिशत, माप्य दुधकोशी गाउँपालिकामा ९५ दशमलव ५६ प्रतिशत, सोताङ गाउँपालिकामा ८७ दशमलव २७ प्रतिशत र लिखुपिके गाउँपालिकामा ९४ दशमलव ८१ प्रतिशत धान रोपिएको छ । खुम्बु पासाङल्हामु गाउँपालिकामा भने भौगोलिक बनावटका कारण धान रोपाइँ गरिँदैन ।

यस वर्ष समयमा वर्षा नहुनु धान रोपाई ढिलो हुनुको मुख्य कारण रहेको सूचना अधिकारी ठाकुरको भनाई छ । तर पछिल्लो समय पानी परेपछि किसानहरू रोपाईमा ब्यस्त भएका छन् र छिटो सक्ने प्रयासमा रहेका छन् ।