सोलुदुधकुण्ड नगरपालिकालाई महालेखा परिक्षकको प्रशंसापत्र

साउन २२, सोलुखुम्बु । सोलुखुम्बुको सोलुदुधकुण्ड नगरपालिकालाई महालेखा परिक्षकको कार्यालयले आर्थिक अनुशासन कायम राखेकामा प्रशंसापत्र प्रदान गरेको छ । आर्थिक वर्ष २०८०÷८१ को लेखा परीक्षणपछि देशभरका स्थानीय तहहरूमध्ये दोस्रो न्यूनतम बेरुजु कायम गर्न सफल नगरपालिकाका रूपमा सोलुदुधकुण्ड नगरपालिकालाई यो सम्मान प्रदान गरिएको हो । महालेखाको प्रतिवेदन अनुसार सोलुदुधकुण्ड नगरपालिकाको बेरुजु केवल ०.०१ प्रतिशत रहेको छ ।

यो उपलब्धिले नगरपालिकाले वित्तीय पारदर्शिता र उत्तरदायित्वमा उल्लेखनीय प्रगति गरेको संकेत गर्दछ । नगरप्रमुख नाम्गेल जाङ्बु शेर्पाले महालेखाबाट प्राप्त प्रशंसापत्रलाई आगामी दिनमा अझ सुदृढ आर्थिक अनुशासन कायम राख्ने प्रेरणाको स्रोत भएको बताउनुभयो ।

उहाँले पारदर्शी, उत्तरदायी र जनमुखी प्रशासन सञ्चालनमा नगरपालिका प्रतिबद्ध रहेको पनि उल्लेख गर्नुभयो । सोलुदुधकुण्ड नगरपालिका स्थानीय तहको कार्यसम्पादन मूल्यांकनमा पनि उत्कृष्ट स्थानमा रहेको छ । आर्थिक सुशासनमा देखाएको प्रतिबद्धता र परिणामको प्रशंसा गर्दै स्थानीय बासिन्दा र सरोकारवालाले नगरपालिकालाई बधाई दिएका छन् ।