परीक्षा केन्द्र निर्धारण गरी सोलु दुधकुण्ड २ मा पहिलो त्रैमासिक परीक्षा सुरु

साउन २२, सोलुखुम्बु । सोलुखुम्बुको सोलु दुधकुण्ड नगरपालिका–२ मा आधारभूत तहको पहिलो त्रैमासिक परीक्षा आजदेखि सुरु भएको छ । वडाध्यक्ष ङवाङ ठिले शेर्पाको अगुवाइमा वडा भित्रका विद्यालयहरूलाई तीनवटा परीक्षा केन्द्रमा विभाजन गरी परीक्षा सञ्चालन गरिएको हो । परीक्षा जुनवेशी माध्यमिक विद्यालय, बेनी केन्द्र, र शालाबेशी केन्द्र गरी तीन केन्द्र तोकिएको छ ।

यस्तै जुनवेशी केन्द्रमा जुनवेशी मावि र हिमालयन शेर्पा बुद्धिस्ट आ.वि., बेनी केन्द्रमा नमो बुद्ध आ.वि. फेरा र सेतीदेवी आ.वि., शालाबेशी केन्द्रमा शालाबेशी आ.वि. (बेनी आ.वि.) र बुद्ध एकेडेमी, तुम्बुकका विद्यार्थीहरू सहभागी भएका छन् । जुनवेशी माविका प्रधानाध्यापक कुमार राउतले परीक्षाको व्यवस्थापन र सञ्चालन जिम्मेवारी लिइरहनुभएको छ । उहाँकै संयोजकत्वमा ६ सदस्यीय परीक्षा अनुगमन समिति पनि गठन गरिएको छ ।

परीक्षाका लागि आवश्यक प्रश्नपत्रहरू हिमालयन ट्रस्ट नेपालले वडाध्यक्ष शेर्पाको विशेष पहलमा निर्माण गरेको हो । साथै, परीक्षामा सहभागी सम्पूर्ण विद्यार्थीहरूका लागि चिया तथा खाजाको समेत व्यवस्था गरिएको छ । यस कार्यले सामुदायिक विद्यालयहरूबीच समन्वय र समान मापदण्डमा मूल्यांकन प्रक्रिया अघि बढाउने विश्वास गरिएको छ ।