खुम्बु पासाङल्हामुले काठमाण्डौमा रहेका ६ सय बढी नागरिकलाई दियो सेवा, ४ लाखबढी राजस्व सङ्कलन

साउन २२, सोलुखुम्बु । सगरमाथा अवस्थित सोलुखुम्बुको खुम्बु पासाङल्हामु गाउँपालिकाले काठमाण्डौमा रहेका ६ सय ६० बढी नागरिकलाई प्रशासनिक सेवा दिएको छ ।  विश्वको सर्वोच्च शिखर सगरमाथाको पालिकाले उपत्यका झरेर ४ दिन सञ्चालन गरेको सेवा शिविरबाट गाउँपालिकाका ६ सय ६२ स्थायी नागरिकले सेवा लिएका हुन । गाउँपालिकाले काठमाण्डौमा आयोजना गरेको सेवा शिविरबाट ४ लाख २ हजार बढी आन्तरिक राजश्व समेत असुल गरेको छ ।

गाउँपालिकाका प्रमुख प्रशासकीय अधिकृत नवराज गौतमका अनुसार गत १८ गतेबाट २२ गते सम्म काठमाण्डौको चावहिलमा आयोजना गरिएको सेवा शिविरमा वडा नम्बर १ का १ सय ६२ जनाले सेवा लिएका छन् ।  सो सङ्ख्याका नागरिकले सेवा लिँदा वडा नम्बर १ बाट २ लाख ३३ हजार रुपैयाँ आन्तरिक राजस्व असुल भएको छ ।  यस्तै वडा नम्बर २ बाट ९४ जनाले सेवा लिँदा ३२ हजार ८ सय ६६, वडा नम्बर ३ का १ सय ६० नागरिकले सेवा लिँदा ६६ हजार ६ सय १३, वडा नम्बर ४ का १ सय २५ नागरिकले सेवा लिँदा ८८ हजार ७४ र वडा नम्बर ५ का १ सय २१ नागरिकले सेवा लिँदा ६४ हजार रुपैयाँ राजस्व सङ्कलन भएको छ ।

गाउँपालिकाले काठमाण्डौमा बसोबास गर्ने गाउँपालिका वासी नागरिकलाई लक्षित गरि आयोजना गरेको सेवा शिविरको पहलकदमी वडा नम्बर १ ले गरेको थियो । शिविर मार्फत गाउँपालिकाले वडा मार्फत हुने सम्पूर्ण सिफारिस, सामाजिक सुरक्षा भत्ता नवीकरण, पञ्जिकरण सम्बन्धी सेवाहरू, तिरोसँग सम्बन्धित सेवाहरूको साथै, प्रमाणित लगायत व्यवसाय दर्ता जस्ता सेवाहरू काठमाण्डौमा दिएको थियो ।