नेचासल्यानको काठमाण्डौ केन्द्रित एकीकृत शिविर सकियो, ११ सय बढीले लिए सेवा

साउन २२, सोलुखुम्बु । सोलुखम्बुको नेचासल्यान गाउँपालिकाले काठमाण्डौमा आयोजना गरेको सेवा शिविरबाट ११ सय बढीले सेवा लिएका छन् ।  गाउँपालिकाले गत साउन १९ गतेबाट २२ गते सम्म ४ दिन काठमाण्डौको सुकेधारा स्थित नवदुर्गा पार्टी प्यालेसमा सञ्चालन गरेको एकीकृत सेवा शिविरबाट सो सङ्ख्याका नागरिकले काठमाण्डौबाटै सेवा लिएका हुन् ।  स्थायी बसोबास नेचासल्यान भई काठमाण्डौमा विभिन्न कारण अस्थायी बसोबास गर्दै आइरहेका पालिका बासीहरूको सहजताका लागी गाउँपालिकाले शिविरको आयोजना गरेको गाउँपालिका अध्यक्ष धनजन राईले बताउनुभयो ।

शिविर मार्फत वडा नम्बर १ का १ सय ९३ जनाले सेवा लिएका छन्  यस्तै वडा नम्बर २ का १ सय २८ जना, वडा नम्बर ३ का १ सय ३०, वडा नम्बर ४ का ९१ जना र वडा नम्बर ५ का ९८ जनाले सेवा लिएका हुन भने गाउँपालिकाले काठमाण्डौबाटै १२ जनालाई ज्येष्ठ नागरिक परिचयपत्र, ३ सय १३ जनालाई राष्ट्रिय परिचयपत्र र २ सय ४ जनाको राष्ट्रिय परिचयपत्र दर्ता गरि परिचयपत्र सम्बन्धी ५ सय २९ जनाले सेवा लिएका छन् । गाउँपालिकाले शिविर मार्फत वडा नम्बर १ बाट ३८ हजार ६ सय ९०, वडा नम्बर २ बाट २० हजार ४ सय ८५, वडा नम्बर ३ बाट १७ हजार ९ सय ९६, वडा नम्बर ४ बाट १९ हजार ८ सय ६३ र वडा नम्बर ५ बाट २५ हजार ३ सय ८ गरि १ लाख २२ हजार ३ सय ४२ रुपैयाँ राजस्व सङ्कलन गरको जनाइएको छ ।

नागरिकलाई आँगनको सरकार भएको अनुभूति हुनेगरि गाउँपालिकाले काठमाण्डौमै गएर सेवा दिएको भन्दै गाउँपालिका उपाध्यक्ष विना राईले सेवा लिनका लागी २० औँ हजार खर्च गरेर पालिका पुग्नुपर्ने नागरिकको बाध्यतालाई हेरेर यो शिविरको आयोजना गरिएको बताउनुभयो ।