सिद्धिचरण नगरपालिका २ ठुलाछापले इटहरी र काठमाण्डौमा सेवा शिविर आयोजना गर्दै 

साउन २३, सोलुखुम्बु । ओखलढुङ्गाको सिद्धिचरण नगरपालिका वडा नम्बर २ ठूलाछापले काठमाण्डौ र इटहरीमा गएर नागरिकलाई सेवा दिने भएको छ ।  ठूला छाप स्थायी बसोबास भई देशका २ ठूला सहर काठमाण्डौ र इटहरीमा अस्थायी बसोबास गरिरहेका नागरिकहरूका लागी वडाले सम्बन्धित स्थानमै गएर सेवा दिने भएको हो ।  वडाले आगामी भदौ १४ र १५ गते २ दिन काठमाण्डौमा र भदौ २१ गते इटहरीमा रहेका नागरिकहरूलाई प्रशासनिक सेवा दिनेगरी शिविर आयोजना गर्न लागेको हो ।  प्रशासनिक कामहरू सिफारिस, नवीकरण, व्यवसाय दर्ता जस्ता सामान्य कामहरूका लागी हजारौं खर्च गरेर वडा आउनुपर्ने बाध्यतालाई चिर्दै वडाले अस्थायी बसोबास रहेका स्थानमै गएर सेवा दिने तयारी गरेको वडा अध्यक्ष बसन्त कटवालले जानकारी दिनुभयो । उहाँका अनुसार सो अवधीमा वडा अध्यक्ष र सचिवले गर्नुपर्ने प्रशासनिक काम इटहरी र काठमाण्डौमा गरिने भएकाले सेवा लिन तोकिएको स्थानमा आउनका लागी आग्रह गर्नुभएको छ ।  वडा सरकार नागरिकको चुल्होको सरकार जस्तै भएकाले यसको अनुभुति नागरिकले गर्न पाउनुपर्ने भन्दै यो शिविर आयोजना गर्न लागिएको उहाँको भनाई छ ।