बहुविवाहलाई वैधानिकता दिन खोजेको भन्दै कोशी प्रदेशसभा सदस्य शेर्पाको विरोध

साउन २३, सोलुखुम्बु । कोशी प्रदेशसभा सदस्य गोम्बु शेर्पाले बहुविवाहलाई मान्यता दिनेगरी संशोधन गरिएको भनिएको प्रावधानको विरोध गर्नुभएको छ । शुक्रबार (आज) बसेको प्रदेशसभा बैठकमा भाग लिँदै शेर्पाले उक्त प्रावधानको विरोध गर्नुभएको हो । उहाँले उक्त कदमलाई महिला अधिकार विरोधी, प्रतिगामी र पितृसत्तात्मक सोचको पराकाष्ठ भन्दै तत्काल खारेज गर्न माग गर्नुभएको छ ।

मुलुकी अपराध संहिता, २०७५ ले बहुविवाहलाई पूर्ण रूपमा निषेध गरेको अवस्थामा सरकारले त्यसलाई उल्ट्याउने गरी विधेयक ल्याउन खोज्नु महिलामाथि हुने हिंसा र अन्यायलाई संस्थागत गर्ने षडयन्त्र भएको उहाँको आरोप छ । सरकारको यो हर्कत देख्दा आफूलाई पनि मुक्तक फुरेको भन्दै उहाँले एक मुक्तक समेत सुनाउनुभएको छ ।