एउटै विद्यालयमा पढ्ने २ साथी मिलेर बालिकाकाे सामूहिक बलात्कार 

साउन २३, सोलुखुम्बु । विद्यालयबाट घर फर्कदैँ गरेकी एक बालिका उनकै विद्यालयका साथीहरुबाटै बलात्कृत भएकी छन् । खोटाङको केपीलासगढी गाउँपालिकाको एक माध्यमिक विद्यालयकी छात्रा माथि उनकै विद्यालयका साथीहरूले सामूहिक बलात्कार गरेका हुन ।  गत साउन १९ गते कक्षा ८ मा अध्ययनरत छात्रालाई विद्यालयबाट घर फर्कदैँ गर्दा सोही विद्यालयको कक्षा ९ मा अध्ययनरत २ छात्राहरुले जंगलमा लगेर बलात्कार गरेको बताइएको छ ।  

विद्यालय गएकी बालिका साथीहरुबाटै बलात्कृत भएको जानकारी पाएपछि आफन्तले साउन २० गते जिल्ला प्रहरी कार्यालय खोटाङमा गएर पीडक भनिएकाहरु माथि कानूनी कारबाहीको माग गर्दै किटानी जाहेरी दर्ता गराएको जनाइएको छ  । अध्ययनका लागि विद्यालय गएर घर फर्कँदै गरेकी बालिकालाई दुई जनाले बाटो छेकेर सामुहिक रुपमा बलात्कार गरेको पुष्टि भएपछि दोषीमाथि कानूनी कारबाहीको माग गर्दै प्रहरीमा किटानी जाहेरी दर्ता गराइएको बलात्कृत बालिकाका आफन्तले बताएका छन् । विद्यालय गएकी बहिनी बेलुका अबेरसम्म घर नफर्किएपछि खोजी गर्दा भोलिपल्ट बिहान ५ः३० बजे घरभन्दा करिब ५०० मिटर टाढा पर्ने राम्चेभीरस्थित ओढारमा झोक्राइरहेको अवस्थामा फेला पारिएको पीडित बालिकाको दाजुले बताएका छन् ।

बालिका बलात्कृत भएको उजुरी कार्यालयमा परेलगत्तै सोही राति (साउन–२० गते) बालिकाको स्वास्थ्य परीक्षण गराएर साउन २१ गते दुई जनाविरुद्ध किटानी जाहेरी दर्ता गरिएको जिल्ला प्रहरी कार्यालय खोटाङका निमित्त प्रमुख प्रहरी निरीक्षक सुशान्त मिश्रले जानकारी दिनुभएको छ । आरोपी २ जनानै हाल फरार रहेकाले खोजी कार्य भइरहेको प्रहरी निरीक्षक मिश्रले बताउनुभयो ।  विद्यालयले उपलब्ध गराएको जानकारीअनुसार बालिकामाथि सामूहिक बलात्कार गरेको आरोप लागेका राई थरका छात्र १५ वर्षका र विश्वकर्मा थरका अर्का छात्र १६ वर्षका छन् ।