सोताङलाई कुनै तागतले हल्लाउन सक्दैन ः पूर्व मन्त्री केसी

साउन २३, सोलुखुम्बु ।  सोलुखुम्बुको सोताङ गाउँपालिकाले पनि आफ्नो एकीकृत सेवा शिविर सुरु गरेको छ ।  २२ र २३ गते २ दिन सम्म सञ्चालन हुने सेवा शिविरको शुक्रबार काठमाण्डौमा उद्‌घाटन भएको हो ।  नेपाली काङ्ग्रेसका नेता पुर्व मन्त्री एवं केन्द्रिय कार्यसम्पादन समिति सदस्य बलबहादुर केसीको प्रमुख आतिथ्यता तथा गाउँपालिका अध्यक्ष खिलराज बस्नेतको अध्यक्षतामा सम्पन्न एक औपचारीक कार्यक्रमका बीच शिविरको उद्‌घाटन गरिएको हो ।

५ वटा वडा रहेको गाउँपालिकाले काठमाण्डौमा रहेका नागरिकहरूका लागी आफ्नो सेवा विस्तार गर्ने उद्देश्य सहित सुरु गरिएको शिविरमा गाउँपालिका स्थायी बसोबास भई काठमाण्डौमा रहँदै आएका पालिकाबासीहरुले सेवा लिने छन् ।  

शिविर उद्घाटनका क्रममा प्रमुख अतिथि एवं काङग्रेस नेता केसीले काठमाण्डौमा बसिरहेका नागरिकलाई दिएको सेवा सराहनीय भएको उल्लेख गर्दै उहाँले यो संघीय व्यवस्थाको उपज भएको उल्लेख गर्नुभयो । उहाँले सोताङ गाउँपालिकालाई कुनैपनि तागतले हल्लाउन नसक्ने उल्लेख गर्दै उहाँले सोताङ गाउँपालिकाले स्वास्थ्य, शिक्षा, खानेपानी, पूर्वाधार लगायत विभिन्न क्षेत्रमा उल्लेखनीय काम गरेको समेत उल्लेख गर्नुभएको थियो ।   

यस्तै कार्यक्रममा बोल्दै गाउँपालिका अध्यक्ष खिलराज बस्नेतले संघीय लोकतान्त्रीक शासन व्यवस्थामा आँगनको सरकारको रुपमा रहेको स्थानीय सरकार भएको नाताले तिर्खाले धाउनुपर्ने भन्दा पनि खोलाले धाउनुपर्ने परिस्थिति भएकोले काठमाण्डौमै सेवा दिने गरि शिविरको आयोजना गरिएको उल्लेख गर्नुभयो ।  उहाँले नागरिकले सामान्य सेवाका लागी गाउँपालिका, वडा सम्म पुग्नुपर्ने बाध्यतालाई हेरेर शिविर आयोजनाको महसुस गरिएको उल्लेख गर्नुभएको थियो ।  

कार्यक्रममा गाउँपालिकाका ५ वटै वडाका अध्यक्ष, गाउँपालिकाका कर्मचारी तथा सोताङ स्थायी बसोबास भई काठमाण्डौमा बसोबास गर्दै आएका नागरिकहरूको बाक्लो उपस्थीति रहेको गाउँपालिकाका सूचना प्रविधी अधिकृत अरुण बस्नेतले बताउनुभयो । उहाँका अनुसार शिविरमा ३ सय २५ जनाले सेवा लिएका छन् ।