वाम्बुले राईको सांस्कृतिक संरक्षणप्रति रक्षामन्त्री राईको प्रशंसा

साउन २४, सोलुखुम्बु । वाम्बुले राई समुदायले आफ्नो ऐतिहासिक र मौलिक चाडपर्वहरूको संरक्षण गर्दै आएकोमा रक्षामन्त्री मानवीर राईले प्रशंसा गर्दै खुसी व्यक्त गर्नुभएको छ । वाम्बुले राई समाज, नेपालको आयोजनामा आज सानो हात्तीवनस्थित किराँत धार्मिक वनमा लिब्जु पूजाको अवसरमा उहाँले खुसी व्यक्त गर्नुभएको हो ।

उहाँले सम्पूर्ण किराँत समुदायलाई आफ्नो मौलिक संस्कृति र परम्पराको संरक्षणमा लागिरहन पनि आग्रह गर्नुभयो । कार्यक्रममा राज्य व्यवस्था तथा सुशासन समितिका सभापति रामहरि खतिवडाले वाम्बुले राई समुदायले आफ्ना मौलिक चाडपर्वहरू जोगाउन सक्रियता देखाएको भन्दै राज्यस्तरबाट आवश्यक सहयोग गर्ने प्रतिबद्धता जनाउनुभएको छ । वाम्रासका केन्द्रीय अध्यक्ष गजुरधन राईका अनुसार आज देशभर वाम्बुले राईहरूले सामूहिक रूपमा ढ्वाङ्कुमो पर्व मनाएका छन् ।