जनैपूर्णिमाको अवसरमा चांगेस्थान मन्दिरमा भव्य मेला सम्पन्न, २ लाखभन्दा बढी भेटी संकलन

साउन २६, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ८ मा अवस्थित प्रसिद्ध धार्मिक स्थल चांगेस्थान मन्दिरमा सदा झै यस बर्ष पनि जनैपूर्णिमाका दिन भव्य रुपमा मेला लागेको छ । सोलुखुम्बु र ओखलढुंगा जिल्लाको सिमानामा पर्ने यस पवित्र स्थलमा यस वर्ष पनि हजारौँ भक्तजनहरूको उपस्थितिमा मेला उल्लासपूर्ण वातावरणमा मनाइएको हो । मन्दिर व्यवस्थापन समितिका अनुसार, यस वर्षको मेलामा २ लाख १५ हजार ६ सय ९५ रुपौयाँ बराबरको भेटी संकलन भएको छ । साथै भक्तजनहरूले १२ थान सुनका टिका, २ थान चाँदीका त्रिशुल, १ थान तामाको डाली, १ थान चाँदीको शिका र २२ थान घण्टी चढाएका छन् ।

मन्दिर व्यवस्थापन समितिका सचिव कर्मा शेर्पाले जानकारी दिनुहुँदै मेलामा ५ हजारभन्दा बढी भक्तजनहरूले मन्दिरमा दर्शन गरेको बताउनुभयो । भक्तजनहरू सोलुखुम्बु जिल्लाका विभिन्न स्थानहरूका साथै छिमेकी जिल्ला खोटाङ, ओखलढुंगा, उदयपुर तथा राजधानी काठमाडौंबाट समेत आएका थिए । तर, मन्दिरमा आवश्यक भौतिक पूर्वाधारको अभाव रहेको गुनासो पनि समितिले गरेको छ । सचिव शेर्पाका अनुसार, शौचालयको व्यवस्था नरहनु, खानेपानीको अभाव, र सडक पहुँचको कमीले दर्शनार्थीहरूलाई समस्या भइरहेको छ । साथै, मन्दिर सोलुखुम्बु र ओखलढुंगा जिल्लाको सिमानामा परे पनि स्थानीय सरकारले मन्दिर व्यवस्थापनमा खासै चासो नदेखाएको भन्दै उहाँले दुःख व्यक्त गर्नुभएको छ ।

चांगेस्थान मन्दिर धार्मिक तथा सांस्कृतिक दृष्टिले महत्वपूर्ण मानिने स्थल हो । पुराना समितिका अधिकांश पदाधिकारीहरू देशबाहिर रहेकाले अघिल्ला वर्षहरूमा संकलन भएको भेटीको स्पष्ट लेखाजोखा नपाइएको हुनाले भविष्यमा मन्दिर व्यवस्थापनलाई व्यवस्थित गर्न १५ दिनअघि मात्र नयाँ समितिको गठन गरिएको जनाइएको छ । भक्तजनहरूको बढ्दो उपस्थितिका बीच अब मन्दिरको पूर्वाधार सुधार र व्यवस्थापनमा सबै सरोकारवाला निकायको ध्यान जान जरुरी देखिन्छ ।