नेपाली कांग्रेस सोलुुले काठमाडौँमा तय गरिएको भनिएको कार्यक्रममा गम्भीर आपत्ति जनाउँदै कार्यकर्तालाई सतर्क रहन आग्रह

साउन २७, सोलुखुम्बु । नेपाली कांग्रेस सोलुखुम्बु जिल्ला कार्यसमितिले हाल काठमाडौँमा तय गरिएको भनिएको एक कार्यक्रमप्रति गम्भीर ध्यानाकर्षण गराएको छ । पार्टी सभापति नाम्गेल जाङबु शेर्पाले एक प्रेस विज्ञप्ति जारी गर्दै पार्टीले यस्तो कुनै पनि आधिकारिक कार्यक्रम तय नगरेको प्रष्ट पार्नुभएको छ ।

विज्ञप्तिमा भनिएको छ, “नेपाली कांग्रेस, संगठन विभाग सोलुखुम्बुद्वारा हालै काठमाडौंमा ‘नेपाली कांग्रेसको वर्तमान कार्यभार’ विषयमा सोलुखुम्बुका नेता–कार्यकर्ताबीच विमर्श कार्यक्रम सफलतापूर्वक सम्पन्न भएको विदितै छ। सो बाहेक काठमाडौँ उपत्यकामा जिल्ला कार्यसमितिले आधिकारिक रूपमा कुनै कार्यक्रम तय नगरेको स्पष्ट गर्दछौं।” जिल्ला कार्यसमितिको नाममा केही व्यक्तिहरुले संगठनको स्वीकृति बिना पार्टी नीतिविपरीत कार्यक्रम घोषणा गरेको भन्दै कांग्रेस सोलुखुम्बुले आपत्ति जनाएको छ । यस्तो कार्यले पार्टीभित्र भ्रम फैलाउने, गुटबन्दी चर्काउने र एकतालाई कमजोर पार्ने चेतावनी विज्ञप्तिमा उल्लेख छ ।

“कार्यकर्ताबीच अनावश्यक भ्रम सिर्जना गर्ने, पार्टीभित्र गुटबन्दी र विवाद चर्काउने तथा दीर्घकालीन पार्टी एकतालाई कमजोर पार्ने दुषित मानसिकता झल्किएको छ,” विज्ञप्तिमा भनिएको छ । साथै, आधिकारिक संरचना र निर्णय प्रक्रियालाई बेवास्ता गर्दै कार्यक्रम तय गर्नु अनुशासनहीनता भएको भन्दै कडा शब्दमा आलोचना गरिएको छ । यसैबीच, अर्को समूहले साउन ३१ गते शनिवार काठमाडौँमा ‘नेपाली कांग्रेस भित्रको अपरिहार्यता, सहमति, सहकार्य र एकता आजको आवश्यकता’ विषयक अन्तरक्रिया कार्यक्रमको तयारी गरेको बताइएको छ । कार्यक्रमका लागि प्रमुख अतिथि खोजी भइरहेको र यदि अन्य नेताहरु उपलब्ध नभए केन्द्रीय सदस्य बल बहादुर केसीलाई प्रमुख अतिथि बनाउने तयारी रहेको निकट स्रोतले जानकारी दिएको छ ।