उदयपुरमा विषालु जङ्गली च्याउ खाँदा एकै परिवारका आठ जना बिरामी

साउन २७, सोलुखुम्बु । उदयपुरको चौदण्डीगढी नगरपालिका–९ अजगरामा जङ्गली च्याउ खाँदा एकै परिवारका आठ जना बिरामी भएका छन्। जङ्गलबाट टिपेर ल्याइएको च्याउ तरकारी बनाएर खाएपछि बिरामी परेका उनीहरूलाई बेल्टारस्थित नगर अस्पतालमा भर्ना गरिएको छ।

इलाका प्रहरी कार्यालय बेल्टारका अनुसार च्याउ खाएर बिरामी हुनेहरूमा ८५ वर्षीया गवनी सदा, ६० वर्षीया गीता सदा, ३१ वर्षीया सञ्जु सदा, २९ वर्षीया मञ्जु सदा, २९ वर्षीया सरिता सदा, १० वर्षीया सन्ध्या सदा, ११ वर्षीया सन्जा सदा र ५५ वर्षीय लल्कु सदा रहेका छन्। बिरामीमध्ये गवनी सदा, गीता सदा र सरिता सदाको अवस्था गम्भीर रहेकाले धरानस्थित बीपी कोइराला स्वास्थ्य विज्ञान प्रतिष्ठान पठाउने तयारी गरिएको वडा अध्यक्ष तथा नगर प्रवक्ता प्रकाश राउतले जानकारी दिनुभयो।

उहाँका अनुसार बाँकी पाँच जनाको उपचार नगर अस्पताल बेल्टारमै भइरहेको छ। सदा परिवारले मंगलबार बिहान घर नजिकैको जङ्गलबाट च्याउ ल्याएर तरकारी बनाएका थिए। त्यसपछि अचानक सबैलाई बान्ता हुने, पेट दुख्ने र टाउको दुख्ने लक्षण देखा परेपछि तत्काल अस्पताल लगिएको थियो।

वडा अध्यक्ष राउतले सदा परिवारको आर्थिक अवस्था निकै कमजोर भएकाले नगरपालिकाको पहलमा उनीहरूको उपचार खर्च निःशुल्क गरिएको बताउनुभयो। स्थानीय निकाय तथा स्वास्थ्यकर्मीहरूले जङ्गलको च्याउ खाँदा विषालु हुन सक्ने भएकाले नचिनिएको च्याउ सेवन नगर्न सबैलाई सचेत रहन आग्रह गरेका छन्। यस्तो दुर्घटना दोहोरिन नदिन जनचेतनामूलक कार्यक्रम पनि सञ्चालन गरिने जनाइएको छ।