हिमाल दर्शनले पुरा गर्यो ५० ओटै संकल्प, स्मारिका विमोचन सँगै आयव्यय सार्वजनीक

साउन २९, सोलुखुम्बु । सोलुखुम्बुको नेचासल्यान गाउँपालिका स्थित हिमाल दर्शन माध्यमिक विद्यालयले आफ्नो ५० वर्ष ५० सङ्कल्प अन्तर्गतको अन्तिम सङ्कल्प समेत पुरा गरेको छ । विद्यालयले ५० वर्ष पुगेको अवसरमा लिएका ५० सङ्कल्प मध्येको अन्तिम सङ्कल्प स्मारिका प्रकाशन तथा विमोचन विहीबार सम्पन्न गरेको हो । स्थापना कालदेखिका संस्थापक, प्रधानाध्यापक, जग्गादाता, विद्यार्थी, दाता लगायत दस्ताबेजहरू समेटिएको स्मारिकाको तेश्रो अङ्क विमोचन गरेको हो । हिसाव स्मारिका २०८१ विमोचन तथा आयव्यय सार्वजनिक कार्यक्रमका बच विद्यालयले गत माघ १३ गते देखी १९ गते सम्म १ हप्ता मनाएको स्वर्ण जयन्तीको आय तथा व्यय विवरण समेत सार्वजनिक गरेको छ ।

हिमाल दर्शन माध्यमिक विद्यालयका व्यवस्थापन समिति अध्यक्ष ओम प्रसाद बास्तोलाको अध्यक्षता, गाउँपालिका अध्यक्ष धनजन राईको प्रमुख आतिथ्यता, गाउँपालिका उपाध्यक्ष विना राईको विशेष आतिथ्यतामा कार्यक्रम सम्पन्न भएको थियो । कार्यक्रममा विद्यालयले स्वर्ण जयन्तीको अवसरमा सङ्कलन भएको आय तथा व्ययको विवरण सार्वजनिक गरेको छ । स्वर्ण जयन्तीको अवसरमा विद्यालयको विभिन्न अभियान अन्तर्गत ४७ लाख ८ हजार २ सय १८ रुपैयाँ सहयोग प्राप्त भएकोमा २४ लाख ५५ हजार ७ सय ७६ रुपैयाँ खर्च भएको जनाइएको छ । कार्यक्रम सम्पन्न भएपश्चात बाँकी रकम २२ लाख ५२ हजार ४ सय ४२ रुपैयाँ विद्यालयको खातामा मौज्दात रहेको विद्यालय व्यवस्थापन समिति अध्यक्ष बाँस्तोलाले बताउनुभयो ।

कबुल गरिएको सहयोग रकम मध्ये ५६ हजार ८ सय १६ रुपैयाँ प्राप्त हुन बाँकी रहेको पनि जनाइएको छ । कार्यक्रममा बोल्दै गाउँपलिका अध्यक्ष धनजन राईले हिमाल दर्शन गाउँपालिकामै नमुना विद्यालय भएको बताउँदै गाउँपालिकाको शैक्षिक क्षेत्रमा विद्यालयले निकै राम्रो नतिजा दिइरहेको उल्लेख गर्नुभएको थियो । यस्तै गाउँपालिका उपाध्यक्ष विना राईले विद्यालयले स्मारिका प्रकाशन गरेर स्वर्णीम इतिहास रचेकोमा धन्यवाद दिनुभयो ।

उहाँले सर्वपक्षीय कार्यगत एकता गर्न सक्ने हो भने कार्यक्रम तथा योजनाहरू सफल हुनेरहेछ भन्ने उदाहरण स्वर्ण जयन्तीले दिएको बताउनुभयो । कार्यक्रममा स्मारिका विश्लेषकहरूले भएका त्रुटिहरूलाई अन्य प्रकाशनमा सच्याउनुपर्ने सुझाव दिँदै विद्यालयको इतिहास स्मारिकाले पठनयोग्य बनाएको भन्दै प्रशंसा गरेका थिए ।