७० वर्षमा नागरिकता पाएपछि हिरा थापा मगर खुशी

साउन ४, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ११ तिङ्लाकी हिरा थापा मगरले ७० वर्षको उमेरमा नेपाली नागरिकताको प्रमाणपत्र प्राप्त गर्नु भएको छ । जीवनको एक महत्त्वपूर्ण मोडमा आइपुगेकी हिरा थापा मगरले बुधबार पहिलोपटक आफ्नो देशको आधिकारिक नागरिक बन्न पाउनु भएको हो । उहाँको नागरिकता पाउने यात्रा सजिलो थिएन । विगत २०–२५ वर्षदेखि श्रीमान सम्पर्कविहीन रहनु, आवश्यक कागजातहरूको अभाव, र प्रशासनिक प्रक्रियामा झन्झटले गर्दा नागरिकता प्राप्त गर्न निकै समय लाग्यो ।

उहाँले अघिल्ला वर्षहरूमा पनि जिल्ला प्रशासन कार्यालयमा नागरिकताको लागि निवेदन दिनुभएको थियो, तर नाता सम्बन्ध र प्रमाणपत्र मिलाउन नसक्दा प्रक्रिया अघि बढ्न सकेको थिएन । नाता सम्बन्धलगायतका कागजात नमिलेका कारण यो प्रक्रिया लामो भएको थियो । प्रमुख जिल्ला अधिकारी अनोज कुमार घिमिरेले नागरिकता दिने प्रक्रिया केही जटिल भए पनि प्रक्रिया मिलेपछि मात्र उहाँलाई नागरिकता दिएको बताउनुभयो । जिल्लाका कुनै पनि नागरिकहरु नागरिकता पाउनबाट बञ्चित नहोस भन्ने हेतुले आफु लागि परेको उहाँको भनाई छ । हिरा थापा मगरले नागरिकता प्राप्त गरेपछि अत्यन्त खुसी प्रकट गर्नुभएको छ ।

उहाँले अब सरकारबाट आउने सेवा सुविधासमेत प्राप्त गर्न सक्नुहुने भएको छ । उहाको नागरिकता प्राप्तिको यो यात्रा केवल उहाँका लागि मात्र नभइ अन्य नागरिकताविहीन नागरिकहरूको लागि पनि प्रेरणाको स्रोत बनेको छ । उहाँका छोरा पदम मगरले बुबाआमाको नागरिकता नहुँदा काकाको नागरिकताको आधारमा आफ्नो नागरिकता बनाएको बताउनुभएको छ । नागरिकता प्राप्त गरेपछि उहाँ र उहाँको परिवारले राज्यका सेवा सुविधामा सहज पहुँच पाउने अपेक्षा गरिएको छ ।