इलाका प्रहरी कार्यालय नेचाको नयाँ भवन शिलान्यास 

भाद्र १०, सोलुखुम्बु । इलाका प्रहरी कार्यालय नेचाको कार्यालय भवन  शिलान्यास गरिएको छ ।  नेपाली काङ्ग्रेसका नेता तथा पूर्व मन्त्री बलबहादुर केसीको प्रमुख आतिथ्यतामा गाउँपालिकाको वडा नम्बर ३ स्थित इलाका प्रहरी कार्यालयको परिसरमा नयाँ भवनको शिलान्यास गरिएको हो ।  नेचासल्यान गाउँपालिकाको भ्याट सहित ५५ लाख ७६ हजार ४ सय ७७ रुपैयाँमा ऋद्धिसिद्धि निर्माण कम्पनीले निर्माणको जिम्मा लिएको छ  ।  

भवन शिलान्यास क्रममा बोल्दै काङ्ग्रेस नेता तथा पूर्व मन्त्री केसीले भवनको निर्माण सम्पन्न समयमै गर्न निर्माण कम्पनीलाइ निर्देशन दिनुभएको छ भने समयमै सम्पन्न नभए वा गुणस्तरमा कमजोरी पाइए त्यसको जिम्मेवारी कम्पनी आफैले लिनु पर्ने उल्लेख गर्नुभएको थियो । सिलान्यासका क्रममा नेचासल्यान गाउँपालिकाका अध्यक्ष धनजन राईले गाउँपालिकाले भवन आवश्यकताकाको महसुस गरेर बजेट विनियोजन गरेको भन्दै समयमै काम सम्पन्न गरि निर्माण सम्पन्न गर्न आग्रह गर्नुभएको थियो ।

 यस्तै उपाध्यक्ष विना राईले भवन निर्माण गुणस्तरीय तथा प्रभावकारी हुनुपर्नेमा जोड दिँदै त्यसको अनुगमन र खवरदारीमा पालिकाले सधै प्रत्यक्ष नजर राख्ने बताउनुभएको थियो ।  शिलान्यासका लागी जिल्ला प्रहरी कार्यालय सोलुखुम्बुका प्रमुख एवं डिएसपी मनोजित कुँवरले प्रहरीले भवन पाउन लागेकामा खुसी व्यक्त गर्दै गाउँपालिकालाई धन्यवाद दिनुभयो ।  प्रहरी आफैले भवन बनाउन सक्ने भएतापनि जग्गाको मापदण्ड नपुग्दा त्याे सम्भव नभएकाले गाउँपालिकाले त्यसको सहजिकरण गरेर भवन निर्माणको जिम्मा लिएकोमा उहाँले खुसी व्यक्त गर्नूभयो । हाल प्रहरी राखिएको भवन पुरानो र जीर्ण अवस्थाको भएकाले नयाँ भवनको आवश्यकता परेको स्थानीयको भनाई छ ।  भुकम्प लगायत अन्य विपत्तिको समयमा मानसिक तनावका बीच नागरिकको सेवा गर्नुपर्ने बाध्यताबाट इलाका प्रहरी कार्यालय नेचा मुक्त हुन लागेको डीएसपी कुँवरको भनाई छ ।