भदौ १०, सोलुखुम्बु । खोटाङको ऐसेलुखर्क गाउँपालिका वडा नम्बर ५ महेश्वरीमा यस बर्षको हरितालिका तीज भव्य रुपमा मनाइएको छ । मंगलबार शिव मन्दिर आमा समूहको आयोजनामा हिरा प्राथमिक विद्यालयमा हरितालिका तीज भव्यताका साथ मनाइएको हो ।
तीज विशेष कार्यक्रम समुहकी अध्यक्ष सरस्वती वनको अध्यक्षता तथा वडा सदस्य सरस्वती परियारको प्रमुख आतिथ्यतामा विविध सांस्कृतिक तथा मनोरञ्जनात्मक कार्यक्रमहरु आयोजना गरिएको थियो । कार्यक्रममा संगिनी नाच, डोरी तान्ने खेल, म्युजिक चियर (कुर्सी दौड), बेलुन जोगाउने जस्ता खेल तथा मनोरञ्जनात्मक प्रस्तुति गरिएको थियो । महिलाहरुले परम्परागत पहिरनमा सजिएर सामूहिक रूपमा नृत्य प्रस्तुत गरेका थिए, जसले कार्यक्रममा उल्लास थपेको थियो । संगिनी नाच प्रतियोगितामा प्रथम हुनेलाई ४ हजार, द्वितीयलाई ३ हजार र तृतीय हुने समूहलाई २ हजार रुपैयाँ पुरस्कार प्रदान गरिएको छ ।
यस्तै डोरी तान्ने खेलतर्फ १ हजार, ८ सय र ५ सय रुपैयाँ पुरस्कार वितरण गरिएको छ । म्युजिक चियर खेलमा सहभागीहरूलाई क्रमशः ८ सय, ५ सय, ४ सय र २ सय रुपैयाँ पुरस्कार प्रदान गरिएको हिरा प्राथमिक विद्यालयका प्रधानाध्यापक गोविन्दप्रसाद घिमिरेले जानकारी दिनुभयो । बेलुन जोगाउने खेलतर्फ पनि क्रमशः ८ सय, ५ सय र ४ सय रुपैयाँ पुरस्कार प्रदान गरिएको छ । समुदायिक सद्भाव, महिला सशक्तीकरण र सांस्कृतिक संरक्षणको सन्देश बोकेको तीज कार्यक्रम सफलतापूर्वक सम्पन्न भएकोमा आयोजकले सहभागी सबैप्रति आभार व्यक्त गरेका छन् ।
Discussion about this post