सोलुखुम्बुमा व्यवसायिक कृषकहरूलाई तीन दिने तालिम प्रदान

भदौ १७, सोलुखुम्बु । व्यवसायिक कृषकहरूलाई लक्षित गर्दै कृषि ज्ञान केन्द्र सोलुखुम्बुले तीन दिने कृषि तालिम प्रदान गरेको छ । जिल्लाका १९ जना अकबरे खुसार्नी तथा टमाटर उत्पादनमा संलग्न व्यवसायिक कृषकहरूलाई कृषि व्यवसायलाई अझ प्रभावकारी बनाउने उद्देश्यले तालिम प्रदान गरिएको हो ।

गत आइतबारबाट सुरु भएको तालिम मंगलबार सम्पन्न भएको कृषि ज्ञान केन्द्र सोलुखुम्बुका सूचना अधिकारी महेश शर्माले जानकारी दिनुभयो । तालिममा व्यवसायिक तरकारी खेति सम्बन्धी विभिन्न तालिम दिइएको छ । तालिमको सहजीकरण कृषि ज्ञान केन्द्रका प्रमुख दुर्गा बहादुर तिरुवा, सोलुदुधकुण्ड नगरपालिका कृषि शाखा प्रमुख डोल्मा दिकि शेर्पा, कृषि विज्ञ उपेन्द्र ठाकुर र सूचना अधिकारी शर्मासहितको प्राविधिक टिमले गरेका थिए ।

प्रमुख तिरुवाले कृषकहरूलाई आधुनिक कृषि प्रणालीमा आधारित भएर उत्पादन वृद्धिको मार्ग खोज्नुपर्ने आवश्यकता औंल्याउनुभयो । उहाँले स्थानीयस्तरमै उत्पादन वृद्धि गर्न सकेमा खाद्य सुरक्षाका साथै आम्दानी बढाउन सकिले उल्लेख गर्नुभयो । यस्ता तालिमहरूले कृषकहरूलाई आत्मनिर्भर बनाउन महत्वपूर्ण भूमिका खेल्ने उहाँको भनाई छ ।

कृषकहरूले तालिमलाई व्यावहारिक र उपयोगी रहेको प्रतिक्रिया दिएका छन् । सहभागी कृषकहले तालिमपछि आफूमा नयाँ ज्ञान थपिएको भन्दै भविष्यमा सिकेका कुराहरू व्यवहारमा उतार्ने बताएका छन् । कृषि ज्ञान केन्द्र सोलुखुम्बुले आगामी दिनहरूमा अन्य बाली तथा पशुपालनसम्बन्धी तालिमहरू पनि सञ्चालन गर्ने योजना बनाएको जनाएको छ ।