सोलुका हाइड्रोबाट पूर्ण क्षमतामा विद्युत उत्पादन हुँदै 

भदौ १९, सोलुखुम्बु ।  जलश्रोत र सम्पदाको धनी हिमाली जिल्ला सोलुखुम्बुबाट २ सय ३२ मेगावाट विद्युत उत्पादन भइरहेको छ ।  जिल्लामा सञ्चालित ६ वटा जलविद्युत आयोजनाबाट २ सय ३२ मेगावाट बढी विद्युत उत्पादन भइरहेको हो । वर्षायामको समयमा जलविद्युतले पूर्ण क्षमतामा विद्युत उत्पादन गरिरहँदा २ सय ३२ दशमलव ८ मेगावाट विद्युत उत्पादन भइरहेको सोलु करिडोर अन्तर्गत १ सय ३२ केभि प्रसारण लाइनको तिङ्ला सबस्टेशन मार्फत राष्ट्रिय प्रसारण लाइनमा करिव २ सय ४० मेगावाट विद्युत जोडिएको छ ।  सबस्टेशन हाल सम्म जिल्लाकै सबैभन्दा ठुलो जलविद्युत आयोजना सोलुखोला दुककोशी जलविद्युत आयोजनाबाट ८६ मेगावाट विद्युत उत्पादन गरिरहेको छ ।  

यस्तै तल्लो सोलुखोला जलविद्युत आयोजना ८२ मेगावाटले ८३ मेगावाट विद्युत वर्षायाममा उत्पादन गरिरहेको छ ।  यसैगरी अपर सोलुले २३ दशमलव ५, दूधकुण्ड जलविद्युतले १२ मेगावाट, मीड सोलुले ९ दशमलव ५ मेगावाट, बेनी हाइड्रोले १९ दशमलव ८ मेगावाट, विद्युत उत्पादन गरिरहेका छन् ।  वर्षायामको समयमा नदिहरूमा पानीको बहाव पुर्ण हुने भएकाले अहिले प्राय जलविद्युत आयोजनाहरूले पूर्ण क्षमतामा उत्पादन गरिरहेका छन् ।

केहिले भने नियमानुसार १० प्रतिशत बढी सम्म गर्न पाउने भएकाले क्षमता भन्दा माथि २ दशमलव ५ मेगावाट सम्म बढी विद्युत उत्पादन गरिरहेको तिङ्ला सवस्टेशनका सुपरभाइजर इन्जिनियर हेमन्त यादवले बताउनुभयो ।  यस्तै सबस्टेशन ओखलढुङ्गा सबस्टेसनबाट पनि ५ देखी १० मेगावाट सम्म विद्युत जोडिने भएकाले हाल तिङ्लाबाट राष्ट्रिय प्रसारण लाइनमा करिव २ सय ४० मेगावाट विद्युत जोडिएको उहाँको भनाई छ ।