उदयपुर सहित चार जिल्लाबाट लागू औषध सहित ११ जना पक्राउ

भदौ १९, सोलुखुम्बु । उदयपुर सहित चार जिल्लाबाट लागू औषध सहित ११ जनालाई प्रहरीले पक्राउ गरेको छ । उदयपुर मोरङ, सुनसरी र इलाम जिल्लाबाट लागू औषधसहित ११ जनालाई प्रहरीले पक्राउ गरेको हो । भदौ १८ गते विशेष सूचनाको आधारमा विभिन्न स्थानमा परिचालित प्रहरी टोलीहरूले लागू औषध ओसारपसार तथा प्रयोगमा संलग्न व्यक्तिहरूलाई नियन्त्रणमा लिएका हुन् ।

मोरङको कानेपोखरी गाउँपालिका–६ मा इलाका प्रहरी कार्यालय पथरी र लागू औषध नियन्त्रण ब्युरो विराटनगरबाट खटिएको टोलीले मिन बहादुर बस्नेतलाई उनको घरको कोठाबाट ४९ ग्राम ८६० मिलिग्राम ब्राउन सुगरसहित पक्राउ गरेको छ । यसैगरी, सुनसरीको इटहरी उपमहानगरपालिका–२ मा इलाका प्रहरी कार्यालय इटहरी र प्रहरी कुकुरसहितको संयुक्त चेकिङ टोलीले चेकजाँचको क्रममा धरान–४ का अनिल राई, प्रेम बहादुर राई, झापा कमल गाउँपालिका–३ का सन्तोष बस्नेत र मोरङ सुन्दरहरैचा–२ का प्रतिक भण्डारीलाई ट्रमाडोल ८५० क्याप्सुल र स्पास ८५ क्याप्सुलसहित नियन्त्रणमा लिएको छ ।

इलाममा पनि लागू औषधसहित तीन जना पक्राउ परेका छन् । जिल्ला प्रहरी कार्यालय इलामले इलाम नगरपालिका–९ बाट इलाम नगरपालिका–६ का रमेश श्रेष्ठ, सन्दकपुर–५ का मन बहादुर बुर्जा मगर, र मोरङ पथरी शनिश्चरे–९ का प्रकाश राईलाई ३ ग्राम ४७० मिलिग्राम ब्राउन सुगरसहित पक्राउ गरेको हो ।

उदयपुरको कटारी–४ मा इलाका प्रहरी कार्यालय कटारीले दिपेन राईलाई प्रतिबन्धित औषधी ४० ट्याब्लेटसहित तथा पुनम थापामगर र अभिषेक थापामगरलाई १ किलो १४० ग्राम गाँजासहित पक्राउ गरेको जनाएको छ । प्रहरीका अनुसार लागू औषधसम्बन्धी क्रियाकलापहरू नियन्त्रण गर्न निगरानी र विशेष अपरेशनहरूलाई थप सशक्त बनाइनेछ ।