गाउँपालिका र पार्टनर्स नेपालको सहकार्यमा चिसापानी पोखरीको पुनर्भरण 

भदौ २१, सोलुखुम्बु  । सोलुखुम्बुको नेचासल्यान गाउँपालिका वडा नम्बर ३ को सिरानमा रहेको चिसापानी पोखरी पुनर्भरण तथा संरचनागत सुधार गरि हस्तान्तरण गरिएको छ ।  नेचासल्यान गाउँपालिका र पार्टनर्स नेपालको लागत साझेदारीमा सुकिसकेको पोखरीलाई पुनः जिवित गराई स्थानीय सामुदायीक वनलाई हस्तान्ततरण गरिएको हो ।  गाउँपालिकाको २० प्रतिशत तथा सहयोगी संस्था पार्टनर्स नेपालको ८० प्रतिशत लागत साझेदारीमा सुरु गरिएको पोखरी पुनर्भरण तथा संरचनागत सुधारको काम सकिएपछि स्थानीय सामुदायिक वनको मातहतबाट व्यवस्थापन र सञ्चालन गर्नेगरी हस्तान्तरण गरिएको हो ।

गाउँपालिका अध्यक्ष धनजन राईको अध्यक्षता उपाध्यक्ष विना राई तथा संस्थाका अध्यक्ष आङ रिता शेर्पाको विशेष आतिथ्यतामा सम्पन्न एक कार्यक्रमका बीच सामुदायिक वनका अध्यक्ष घनश्याम बास्तोलालाई पोखरी हस्तान्तरण गरिएको हो । ऐतिहासिक तथा पर्यटकीय महत्व बोकेको पोखरी विभिन्न कालखण्डमा आएका भुकम्प तथा व्याप्त जलवायु परिवर्तनका सङ्कटका कारण सुकेर खण्डहर बनेको थियो । प्राकृतिक सम्पदाको रुपमा रहेको पोखरीलाई गाउँपालिकाले प्राथमिकता दिएर काम गरेको गाउँपालिका अध्यक्ष धनजन राईले दावी गर्नुभयो । उहाँले गाउँपालिकाको अभियानलाई साथ दिने पार्टनर्स नेपाललाई धन्यवाद समेत दिनुभयो ।

कार्यक्रममा बोल्दै गाउँपालिका उपाध्यक्ष विना राईले सबै पक्षको सहकार्य भए समृद्धिको बाटो टाढा नरहेको जिकिर गर्दै पार्टनर्स नेपालको साथले पोखरीको सौन्दर्यता फर्किएको भन्दै खुसी व्यक्त गर्नुभयो । उहाँले पोखरीको सौन्दर्यता फर्किएपछि यहाँको पर्यटन प्रवद्र्धनमा पनि टेवा पुग्ने विश्वास व्यक्त गर्नुभयो ।  यता संस्थाका अध्यक्ष शेर्पाले आफूहरू प्राकृतिक सम्पदा ताथ वातावरणको संरक्षण र सम्वर्द्धन वर्षौँदेखि नियमित काम गरिरहेको उल्लेख गर्नुभयो । यस्तै संस्थाका सचिव भीम राईले आफ्नो पहलमा गाउँपालिका क्षेत्रमा ६ वटा पोखरी यसअघि पुनर्भरण गरिसकिएको स्मरण गर्दै चिसापानी पोखरीको सौन्दर्यता र साख कायम गर्न सबै पक्ष लागी पर्नुपर्नेमा जोड दिनुभयो ।

कार्यक्रममा बोल्दै गाउँपालिकाका प्रमुख प्रशासकीय अधिकृत टङ्कनाथ घिमिरेले गाउँपालिकाको समग्र विकासका लागी सबै पक्षले समान सहकार्य गर्न जरुरी रहेको उल्लेख गर्नुभएको थियो ।  लामो समयदेखी सुख्खा बनेको पोखरीलाई वरीपरि घेराबारा गरि, सौन्दर्यीकरण गरेर पानी हालिएको छ । पोखरीको सौन्दर्यीकरण गरिएपछि पोखरी पर्यटकहरूको रोजाईमा पर्ने गरेको छ ।  पोखरी हस्तान्तरण कार्यक्रममा स्थानीय राजनैतिक दलका प्रमुख एवं प्रतिनिधी, कर्मचारी, स्थानीय, पत्रकार लगायतको उपस्थिति रहेको थियो ।