सोलुदुधकुण्ड नगरपालिकामा २४५ सामुदायिक कुकुरको बन्ध्याकरण र रेविजविरुद्ध खोप

असोज ९, बिहिबार । सोलुखुम्बुको सोलुदुधकुण्ड नगरपालिकामा सञ्चालन गरिएको आठ दिने पशु स्वास्थ्य शिविरमा २४५ वटा सामुदायिक तथा छाडा कुकुरको स्थायी बन्ध्याकरण तथा रेविजविरुद्धको खोप लगाइएको छ । नगरपालिकाको आयोजना तथा नेपाल एनिमल वेलफेयर एण्ड रिसर्च सेन्टरको प्राविधिक सहयोगमा सञ्चालन गरिएको उक्त शिविर असोज २ गतेदेखि ९ गतेसम्म सञ्चालन भएको हो ।

यसपालिको कार्यक्रम गाउँबस्तीमै पुगेर सञ्चालन गरिएको पशु स्वास्थ्य प्राविधिक गणेश थापाले जानकारी दिनुभयो । “यसअघि बजार क्षेत्र केन्द्रित कार्यक्रम भए पनि योपटक गाउँगाउँमा पुगी सेवा पु¥याइएको हो” उहाँले भन्नुभयो । शिविर वडा नम्बर १, २, ३, ४, ५, ६, ७, ८, १० र ११ मा सञ्चालन गरिएको थियो । स्थानीयवासीहरूले कुकुरको संख्या बढ्दै गएकाले बालबालिका र सर्वसाधारणलाई सडकमा हिँड्न समेत असहज हुने गरेको बताएका छन् ।

उनीहरूले यस्ता कार्यक्रमलाई निरन्तरता दिनुपर्ने सुझाव दिएका छन् । नगरपालिकाले आगामी दिनमा आवश्यकताअनुसार यस्ता शिविर सञ्चालन गर्ने प्रतिबद्धता जनाएको छ । नगरपालिकाको पहलले पशुजन्य रोग नियन्त्रण र सामुदायिक सुरक्षामा टेवा पुग्ने विश्वास लिइएको छ ।