सरकारी सवारी साधन दुरुपयोग नगर्न सोलुखुम्बु प्रशासनको निर्देशन

सोलुखुम्बु, भदौ ९ । चाडपर्व तथा विदाको दिनहरूमा सरकारी तथा संस्थानगत सवारी साधनहरूको व्यक्तिगत प्रयोजनमा दुरुपयोग हुँदै आएको गुनासो बढेपछि जिल्ला प्रशासन कार्यालय सोलुखुम्बुले कडा निर्देशन जारी गरेको छ । प्रशासनले बिहीबार सार्वजनिक गरेको सूचनामा अत्यावश्यक कार्यका लागि बाहेक अन्य कुनै पनि प्रयोजनमा विदाको दिन सरकारी सवारी साधन सञ्चालन नगर्न सम्बन्धित सबै निकायलाई निर्देशन दिएको हो ।

कार्यालय प्रयोजन बाहेक विदाको दिनमा सवारी साधन प्रयोग भएको पाइएमा त्यसको सम्पूर्ण जिम्मेवारी सम्बन्धित पदाधिकारी वा कर्मचारी स्वयंले लिनुपर्ने प्रशासनले जनाएको छ । सहायक प्रमुख जिल्ला अधिकारी सुरेन्द्र थापाले हस्ताक्षर गरेको सूचनामा यस्तो कार्यशैलीले सरकारी सम्पत्तिको दुरुपयोग मात्र नभई जनमानसमा नकारात्मक सन्देश जाने खतरा पनि औंल्याइएको छ ।

प्रशासनले सार्वजनिक संस्थानका सवारी साधनको पारदर्शी र जिम्मेवार प्रयोगको सुनिश्चितता गर्न यस्तो कदम चालेको बताइएको छ । यसअघि पनि पटक–पटक सरकारी सवारीहरू व्यक्तिगत प्रयोजनमा प्रयोग भइरहेको भन्दै आलोचना हुँदै आएको थियो । प्रशासनले सवारी साधनको दुरुपयोग नियन्त्रण गर्न निगरानी समेत कडा पार्ने तयारी गरेको जनाइएको छ ।