सोलुदुधकुण्डका शिक्षकलाई दूरी अनुसारको स्थानीय भत्ता, जिल्ला बाहिरका लाई शत प्रतिशत 

असोज १२, सोलुखुम्बु । सोलुखुम्बुको सोलुदुधकुण्ड नगरपालिकाले शिक्षकलाई दूरीका आधारमा स्थानीय भत्ता उपलब्ध गराएको छ । सरकारले तोकेबमोजिम नगरपालिकाले चालु आर्थिक वर्षको पहिलो त्रैमासिकको तलबमा स्थानीय भत्ता समेत प्रदान गरेको हो ।  नेपाल सरकार शिक्षा मन्त्रालयले गरेको वर्गीकरणका ग बर्गका जिल्लाहरूमा पर्ने सोलुखुम्बु, ओखलढुङ्गा, खोटाङ, भोजपुर लगायतका अन्य १४ वटा जिल्लामा ग बर्गको स्थानीय भत्ता प्रदान गर्न सकिने व्यवस्था छ ।

सोही बमोजिम नगरपालिकाले स्थानीय भत्ता शिक्षकहरूलाई प्रदान गरिएको मेयर नाम्गेल जाङबु शेर्पाले बताउनुभयो । नगरपालिकाले ६ कोष भित्र अर्थात स्थानीय शिक्षकलाई २५ प्रतिशत, पालिका बाहिरका शिक्षक अर्थात ६ कोष बाहिरका शिक्षकलाई ५० प्रतिशत र जिल्ला बाहिरका शिक्षकलाई शतप्रतिशत स्थानीय भत्ता उपलब्ध गराएको हो ।  

नगरप्रमुख शेर्पाले स्थानीय भत्ता शिक्षकलाई राज्यले तोकेबमोजिम र नियमबमोजिम उपलब्ध गराइएको उल्लेख गर्दै नगरपालिका शिक्षकलाई अन्य थप प्रोत्साहन गर्ने कुरामा पनि सकारात्मक भएको प्रतिकृया दिनुभयो । शिक्षा तथा मानवस्रोत विकास केन्द्रको कार्यक्रम कार्यान्वयन कार्यविधि २०८२/८३ ले शिक्षकहरूलाई स्थानीय भत्ता दिने व्यवस्था गरेको छ ।