हवाइ टिकटमा मनलाग्दो भाडा लिएको गुनासोपछि प्राधिकरणद्धारा अधिकतम हवाई भाडादर सार्वजनिक

असो्ज १८, सोलुखुम्बु । नेपाल नागरिक उड्डयन प्राधिकरणले आन्तरिक उडानको हवाई भाडादर सार्वजनिक गरेको छ । चाडपर्वको बेला एअरलाइन्स कम्पनीहरुले जथाभावी भाडा लिएको गुनासो आइरहेका बेला प्राधिकरणले विभिन्न रुटको अधिकतम भाडादर सार्वजनिक गरेको हो ।

नेपाल सरकारबाट स्वीकृत तोकिएको अधिकतम भाडादरभन्दा बढी रकम नलिन वायु सेवा कम्पनी र सरोकारवालालाई निर्देशन दिइसकेको पनि प्राधिकरणले जनाएको छ। तोकिएको भन्दा बढी भाडा लिएमा कारबाही गर्ने प्राधिकरणको चेतावनी छ।

प्राधिकरणले सार्वजनिक गरेको भाडासूची अनुसार सबैभन्दा धेरै भाडा काठमाण्डौ –धनगढीको १७ हजार पाँच सय ७९ रुपैयाँ र सबैभन्दा कम भाडा काठमाण्डौ –सिमराको तीन हजार नौ सय ७८ रुपैयाँ छ ।यस्तै काठमाडौं–नेपालगञ्जको १३ हजार एक सय तीन रुपैयाँ, काठमाण्डौ –भद्रपुरको १२ हजार १ सय १२ रुपैयाँ, काठमाण्डौ –विराटनगरको भाडा नौ हजार सात सय ८५ रुपैयाँ र काठमाण्डौ –सुर्खेतको नौ हजार ३० रुपैयाँ भाडा रहेको छ । काठमाण्डौ –पोखराको भाडा अधिकतम ६ हजार ६ सय ३५ रुपैयाँ रहेको छ ।