मौसम प्रतिकुल हुँदा छुट्टी लिएर नेपाल घुम्न आएका पर्यटक समस्यामा 

असोज १९, सोलुखुम्बु । हिमाली जिल्ला सोलुखुम्बु घुम्न आएका पर्यटक मौसम प्रतिकुलताका कारण अलपत्र परेका छन् ।  २ दिन देखी परेको अविरल वर्षातका कारण देश विदेशबाट हिमाली सुन्दरता र यहाँको वातावरणमा रम्न आएका पर्यटक गन्तव्य नपुग्दै बीचमै फसिरहेका हुन । काठमाण्डौबाट सिधै लुक्लाका लागी हिँडेका पर्यटक तथा गाइडहरू कतिपय रामेछापमा अड्कीएका छन् भने कतिपय जिल्ला सदरमुकाम नजिकै रहेको फाप्लु विमानस्थलमा आएर थन्किएका छन् ।

प्लनेको टिकट काटेर हजारौँ रकम तिरेर आएका पर्यटकहरू गन्तव्य नपुग्दै मौसम बिग्रँदा बीचमै अलपत्र पर्नुपरेको ताइवानी एक पर्यटकले बताए ।  शारदीय सिजनको प्रारम्भमै मौसम प्रतिकुल हुँदा पर्यटन व्यवसायीहरूलाई भने मार परेको छ ।  अघिल्ला वर्षहरुमा यतिखेर दैनिक ४ देखी ५ सयको हाराहारीमा पर्यटक नाम्चे पुग्ने गरेकोमा अहिले त्यस्तो नभई दैनिक १५ देखी २० जना मात्रै प्रवेश गर्ने गरेको सगरमाथा प्रदुषण नियन्त्रण समितिका संयोजक लामाकाजी शेर्पाले बताउनुभयो ।

 प्रतिकुल मौसम भएपछि लुक्ला मन्थली, मन्थली काठमाण्डौ लगायतका उडान हुन सकिरहेका छैनन् ।  फाट्टफुट्ट हुने उडानहरुबाट मन्थली आएका पर्यटकहरुपनि विमानस्थलमै अलपत्र परेर बसिरहेका छन् । आइतबार विहान फाप्लु विमानस्थलमा भएका केही उडानहरू मार्फत फाप्लु आएका पर्यटकहरू गाडी मार्फत खरिखोला हुँदै गएका छन् । तर सडकको अवस्था समेत नाजुक हुँदा सहज यात्रा नहुने जनाइएको छ ।