सोलुखुम्बुको खुम्बु क्षेत्रमा भत्किएका पदमार्गको मर्मत कार्य सुरु

सोलुखुम्बु, असोज २२ । सोलुखुम्बुको खुम्बु पासाङल्हामु गाउँपालिका अन्तर्गतका विभिन्न पदमार्गहरू हालैको अविरल वर्षातका कारण भत्किएपछि मर्मत कार्य सुरु गरिएको छ । विशेष गरी गाउँपालिकाका वडा नम्बर ३, ४, र ५ मा रहेका छ वटा प्रमुख पदमार्गहरू अवरुद्ध भएपछि ती मार्गहरू पुनः सञ्चालनमा ल्याउने कार्य तीव्र गतिमा भइरहेको स्थानीय जनप्रतिनिधिहरूले जनाएका छन् ।

वडा नम्बर ४ मा पर्ने मोङ डाँडा मुनिदेखि गोक्यो जाने बाटो तथा फोर्चे थेङादेखि फोर्चेसम्मको पदमार्गको मर्मत कार्य सुरु भइसकेको वडा अध्यक्ष लक्ष्मण अधिकारीले जानकारी दिनुभयो । उहाँका अनुसार फोर्चेबाट गोक्योसम्मको अर्को मार्ग पनि चाँडै मर्मत गरिने तयारी भइरहेको छ । त्यसैगरी, वडा नम्बर ५ अन्तर्गत नाम्चेदेखि फुर्तेसम्मको पदमार्गको मर्मत कार्य पनि जारी रहेको वडा सचिव सुवास तामाङले जानकारी दिनुभयो । उहाँले थामे पुलदेखि थामेसम्मको पदमार्ग पनि छिट्टै मर्मत गरिने योजना रहेको बताउनुभयोे ।

वडा नम्बर ३ मा पर्ने जोरसल्लेदेखि हिलारी ब्रिज जाने बाटोको अवस्थाबारे भने हालसम्म वडा अध्यक्षसँग सम्पर्क हुन नसकेकोले विवरण प्राप्त हुन सकेको छैन् । यतिबेला पर्यटकिय सिजन चलिरहेको हुँदा पदमार्गहरू भत्किएर स्थानीयवासी र पर्यटकहरू दुबैलाई समस्या भएको छ । गन्तव्यमा हिँड्नु अघि पर्यटक, गाइड तथा स्थानीय यात्रुहरूलाई आवश्यक सूचना संकलन गरेर मात्रै यात्रा गर्न खुम्बु पासाङल्हामु गाउँपालिकाले आग्रह गरेको छ ।