सगरमाथाको तिब्बततर्फ फसेका ५८० पदयात्रीको सफल उद्धार

असोज २२, सोलुखुम्बु । प्रतिकूल मौसमका कारण विश्वको सर्वोच्च शिखर सगरमाथाको तिब्बततर्फको पूर्वी मोहडातिर फसेका ५ सय ८० जना पदयात्रीलाई उद्धार गरी सुरक्षित ठाउँमा पुर्‍याइएको छ । ३ सय स्थानीय पथप्रदर्शक, चौँरीको रेखदेख गर्ने केही मानिसहरू र अन्य सहयोगीहरूसँगै ती पदयात्रीहरूलाई तिब्बतको सानो नगर वोदाङ र आसपासका सुरक्षित क्षेत्रमा पुर्‍याइएको चिनियाँ सञ्चारमाध्यमहरूलाई उद्धृत गर्दै बीबीसीले जनाएको छ ।

उद्धारकर्मीसहित झन्डै १० जना पदयात्रीसहितको अन्तिम समूह अझै वोदाङ पुग्न नसकेको तर उनीहरू अक्सिजनसहितका आपत्कालीन आपूर्ति व्यवस्था भएको ठाउँमा पुगिसकेका खबरमा उल्लेख छ । सप्ताहन्तमा सगरमाथाको तिब्बततर्फको पूर्वी मोहडातिर जाने बाटोमा ठूलो हिमपात भएपछि ती पर्यटकहरू अलपत्र परेका थिए । चीनमा ८ दिने राष्ट्रिय बिदा शुरू भएसँगै हजारौं पर्यटक र बाहिरी खेलप्रेमीहरू यस क्षेत्रका प्रसिद्ध ट्रेकिङ मार्गहरूमा पुगेका थिए ।

तर सप्ताहन्तमा परेको हिमपातले धेरै शिविरहरू पुरिँदा यात्रुहरू फस्न पुगेका थिए । त्यसपछि उद्धारकर्मीहरूले घोडा, याक र ड्रोनसम्म प्रयोग गरी ठूलो मात्रामा उद्धार अभियान सञ्चालन गरेका थिए । पछिल्ला वर्षहरूमा चीनको पश्चिमी उच्चभूमि क्षेत्रमा पर्यटन तीव्र गतिमा बढ्दै आएको छ ।