एसेलुखर्कमा वडा स्तरीय खुल्ला पुरुष भलिबल तथा व्याडमिन्टन प्रतियोगिता हुने

असोज २५, सोलुखुम्बु । खोटाङको एसेलुखर्क गाउँपालिका वडा नम्बर १ मा वडा स्तरीय खुल्ला पुरुष भलिबल तथा व्याडमिन्टन प्रतियोगिता हुने भएको छ । शुभ दिपावलीको अवसरमा आयोजना हुन लागेको प्रतियोगिता गाउँपालिका वडा नम्बर १ को वडास्तरीय खेलकुद कार्यक्रम अन्तर्गत असोज ३१ गतेदेखि कार्तिक २ गतेसम्म सञ्चालन हुने आयोजकले जानकारी दिएको छ ।

प्रतियोगितामा भलिबलतर्फ प्रथम हुने टिमले नगद ३० हजार रुपैयाँसहित ट्रफी, मेडल र प्रमाणपत्र प्राप्त गर्नेछ भने द्वितीय, तृतीय र सान्त्वना स्थान हासिल गर्ने टिमले क्रमशः २० हजार, १५ हजार र ५ हजार रुपैयाँसहित ट्रफी, मेडल र प्रमाणपत्र पाउने वडा अध्यक्ष पुरुषोत्तम राजभण्डारीले जानकारी दिनुभयो ।

त्यस्तै, व्याडमिन्टनतर्फ प्रथम हुने खेलाडीले ७ हजार रुपैयाँ, द्वितीयले ५ हजार रुपैयाँ र तृतीयले ३ हजार रुपैयाँसहित सिल, मेडल र प्रमाणपत्र प्राप्त गर्नेछन् । प्रतियोगितामा सहभागी हुन इच्छुक खेलाडी तथा टिमहरूले असोज ३० गते साँझसम्म टिम दर्ता गरिसक्नुपर्नेछ । स्थानीयस्तरमा खेलकुद प्रवद्र्धन तथा युवाहरुलाई सशक्तिकरण गर्ने उद्देश्यले आयोजना हुन लागेको यस प्रतियोगिताले समुदायमा सकारात्मक ऊर्जा फैलाउने विश्वास लिइएको छ ।