बढ्दै मुन्धुम ट्रेलमा पर्यटक, दैनिक ३ सयको हाराहारीमा यात्रामा निस्किन्छन्

असोज २५, सोलुखुम्बु । मुन्धुम ट्रेल भ्रमण गर्ने पर्यटकहरूको सङ्ख्या अहिले निकै बढेको छ ।  खोटाङ, भोजपुर, सङ्खुवासभा सहित सोलुखुम्बु गरि ४ वटा जिल्लालाई समेटिने ट्रेलको भ्रमण गर्ने पर्यटकहरूको सङ्ख्या दिनप्रतिदिन बढिरहेको हो ।  दशैँ सकिएलगत्तै मुन्धुम ट्रेलमा जानेहरूको सङ्ख्या दिनानुदिन बढिरहेको जनाइएको हो ।  भोजपुर, खोटाङ, सहित पहाडी जिल्लाहरूका साथै उपत्यकाबाट लामो दुरीको यात्रामा निस्कीएका पर्यटकहरू अहिले मुन्धुम ट्रेलको यात्रामा रहेको भेडापालकहरुको भनाई छ । शुक्रबार र शनिबार मात्रै करिव ३ सय ५० को हाराहारीमा पर्यटकहरु मुन्धुम ट्रेलको यात्रामा निस्कीएको भेडापालक किसान समीप साम्पाङले बताउनुभयो ।

 उहाँका अनुसार चखेवा तर्फबाट १ सय ५० देखी २ सय पर्यटकहरू ट्रेल तर्फ लागेका छन् । यस्तै भोजपुरको सुन्तले तर्फबाट करिव १ सय ५० पर्यटकहरू मुन्धुम ट्रेलको यात्रामा रहेको जनाइएको छ ।  पूर्वी क्षेत्रमा निकै चर्चा कमाएको मुन्धुम ट्रेलमा वर्षेनी पर्यटकहरूको आकर्षण बढीरहेका उहाँको भनाई छ ।  यहाँको प्राकृतिक सुन्दरता, ताल तलैया, पोखरी तथा डाँडाकाँडाहरूको अवलोकन गर्दै चखेवाबाट ३ दिनमा संखुवासभास्थीत साल्पा पोखरी पुग्न सकिने भएकाले पर्यटकहरुको राजाईमा मुन्धुम ट्रेल पर्ने गरेको छ ।  पर्यटकहरूको चाप बढेकाले सो क्षेत्रमा उनीहरूको व्यवस्थापनमा भने चुनौति थपिएको छ ।  पर्यटकीय क्षेत्र भएतापनि यहाँ जाने पर्यटकहरुलाई खाना तथा बासको उचित प्रबन्ध हुने खालको संयन्त्रहरूको कमीले गर्दा समस्या हुने गरेको छ ।  यद्यपि भेडीगोठहरु खाली भएकाले पर्यटकहरूले आफ्नो व्यवस्थापन गरेर त्यहाँ बस्न सक्ने अवस्था रहेको जनाइएको छ ।

 मुन्धुम ट्रेलको विस्तार र प्रवद्र्धनका लागी यसको प्रवद्र्धक संस्था मैयुङ ट्याम्के साल्पा सिलिचुङ पर्यटन प्रवर्तन केन्द्रले मुन्धु ट्रेल भ्रमण वर्ष २०२५ को रुमा मनाइरहेकाले पनि अहिले पर्यटकहरूको सङ्ख्या बढेको हो । ट्रेलमा दैनिक ३ सय को हाराहारीमा पर्यटकहरू पुग्ने गरेको मैयुङ ट्याम्के साल्पा सिलिचुङ पर्यटन प्रवर्तन केन्द्रका अध्यक्ष रमेश कुमार राईले बताउनुभयो ।  हालको लागी मुन्धु ट्रेल घुम्न जाने पर्यटकहरुले स्लीपिङ व्याग लगायतका आवश्यक सरसामान बोकर जानुपर्ने अवस्था रहेको पनि उहाँको भनाई छ ।