हमासले २० जना जीवित बन्धक रेडक्रसलाई जिम्मा लगायो, नेपाली युवा विपिन जोशीको अवस्था अझै अज्ञात

असोज २७, सोलुखुम्बु । प्यालेस्टिनी विद्रोही समूह हमासले आफूसँग रहेका २० जना जीवित सबै बन्धक फिर्ता गरेको छ । हमासले विज्ञप्ति निकालेर सन् २०२३ को अक्टुबर ७ तारिखमा इजरायल आक्रमणका क्रममा बन्धक बनाएकामध्ये जीवित रहेका बाँकी २० जना सबैलाई अन्तर्राष्ट्रिय रेडक्रस समितिको जिम्मा लगाएको बताएको बीबीसीले जनाएको छ ।

इजरायल आक्रमणका क्रममा अपहरणमा परेका २ सय ५१ मध्ये विभिन्न चरणमा जीवित तथा शव जिम्मा लगाएर ४७ जना बाँकी थिए । १ जना अघिल्लो युद्धका सैनिकसमेत गरी यस पटक ४८ जना सबैलाई रिहा गर्न हमास सहमत भएको हो । ४८ मध्ये २० जना जीवित रहेका हुन् । २६ जनाको ज्यान गइसकेको र उनीहरुको अवशेष हस्तान्तरण गर्ने हमासले बताएको छ । नेपालका विपिन जोशीसहित बाँकी २ जनाको अवस्था अझै थाहा हुन सकेको छैन ।

इजरायलको सेनाले विपिन जीवित रहेको कुनै प्रमाण नभेटिएको बारेमा औपचारिक जानकारी दिएको इजरायलका लागि नेपाली राजदूत धनप्रसाद पण्डितले बताउनुभएको छ । तर बहुराष्ट्रिय सेनाले गाजामा रहेका सुरुङभित्र जोशीको खोजी गरिरहेको उहाँले बताउनुभयो । जीवित र मृतक दुवैतर्फका सूचीमा नपरेका कारण खोजीका क्रममा भेटिन सक्ने आशा बाँकी रहेको विपिनका आफन्तले बताएका छन् ।