सैनिक अस्पताललाई सिटी सफारी हस्तान्तरण : बिरामीको छिटो उपचारमा सहयोग हुने

कार्तिक ३, सोलुखुम्बु । नेपाली सेनाको इटहरीस्थित पूर्वी पृतना हेडक्वार्टर अन्तर्गतको सैनिक अस्पताललाई सुविधा सम्पन्न विद्युतीय इ–रिक्सा (सिटी सफारी) हस्तान्तरण गरिएको छ। सेनाकै मातहतमा रहेको सामुदायिक सर्पदंश उपचार केन्द्रका पदाधिकारीहरूले अस्पताललाई उक्त सवारी साधन हस्तान्तरण गरेका हुन्। सैनिक ब्यारेकभित्र केन्द्रको प्रांगणमा आयोजित एक विशेष समारोहमार्फत पूर्वी पृतना हेडक्वार्टरका पृतनापति उपरथी गौरवकुमार केसीलाई सिटी सफारी हस्तान्तरण गरिएको हो।

कार्यक्रममा सामुदायिक सर्पदंश उपचार केन्द्र इटहरीका अध्यक्ष दिवश पोखरेलले सिटी सफारी हस्तान्तरणको उद्देश्यबारे जानकारी दिँदै इटहरीका विभिन्न क्षेत्रबाट गम्भीर अवस्थाका बिरामीहरूलाई यथासक्य चाँडो सैनिक अस्पतालसम्म ल्याउन तथा उपचारपछि घरसम्म पुर्‍याउन सहज बनाउने उद्देश्यले यो सवारी साधन उपलब्ध गराइएको उहाँको भनाई छ ।

सैनिक अस्पताल इटहरीका कमान्डेन्ट प्राविधिक महासेनानी डा.कुमार रोकाले पनि यातायातको सुविधा अभावमा कतिपय बिरामीले समयमै उपचार नपाई ज्यान गुमाउनु परेको घटनाहरू भएको उल्लेख गर्दै सिटी सफारी प्राप्त भएपछि स्वास्थ्य सेवा अझ छिटो र प्रभावकारी हुने विश्वास व्यक्त गर्नुभयो ।

कार्यक्रममा सामुदायिक सर्पदंश उपचार केन्द्रका अध्यक्ष दिवश पोखरेल, उपाध्यक्ष राजु थापा, कोषाध्यक्ष उदय सुब्बा, भगवती दलका गणपति प्रमुख सेनानी राजन मुखु लगायत सञ्चारकर्मीहरूको उपस्थिति रहेको थियो। सामुदायिक सर्पदंश उपचार केन्द्र इटहरीमा स्थापना भएदेखि हालसम्म १९ हजारभन्दा बढी बिरामीहरूको सफल उपचार भइसकेको जनाइएको छ।