माप्यबाट महाकुलुङ हिँडेको गाडी दुर्घटना ३ जनाको मृत्यु, ६ घाइते

कार्तिक ६, सोलुखुम्बु । सोलुखुम्बुमा बोलेरो गाडी दुर्घटना हुँदा ३ जनाको ज्यान गएको छ । विहीबार साँझ करिव ६ः३० बजेतीर जिल्लाको माप्य दुधकोशी गाउँपालिकाबाट महाकुलुङ गाउँपालिकातर्फ जाँदै गरेको बोलेरो गाडी दुर्घटनामा परेको हो । माप्य दुधकोशी गाउँपालिका वडा नम्बर ६ र ७ को सिमानामा रहेको भिरकुनामा दुर्घटनामा परेको गाडी सडकबाट करिव ४ सय मिटर तल खसेकोमाप्य दुधकोशी गाउँपालिका वडा नम्बर ७ का अध्यक्ष सगुजित राइले बताउनुभयो । दुर्घटनाबाट ६ जना घाइते भएको वडा अध्यक्ष राईले बताउनुभयो । खुम्बुबाट महाकुलुङ हिँडेका यात्रु लिन माप्य गएको गाडी फर्किने क्रममा दुर्घटनामा परेको उहाँको भनाई छ । मृतकहरुको सनाखत नभएकाले उनिहरुको नाम खुलाइएको छैन भने चालक सहित  ६ जना घाइते भएको अध्यक्ष राईको भनाई छ । रातीको घटना भएकाले पुष्टि र पहिचानमा समस्या भएको जिल्ला प्रहरी कार्यालय सोलुखुम्बुले जनाएको छ । घाइतेहरुलाई उपचारका लागी वाकु अस्पताल पठाइएको जनाइएको छ ।