खोटाङमा १५ दिनमा ६ जनाको आत्महत्याबाट मृत्यु, किन सल्किँदैछ आत्महत्याको आगो ? 

असोज ८, सोलुखुम्बु । गएको १४ दिनको अवधीमा खोटाङमा ९ जना अस्वभाविक र असामयिक मृत्यु भएको छ ।  गत असोज २५ गते देखी कार्तिक ७ गते सम्मकाे १४ दिनको अवधीमा ९ जनाको भवितव्यमा परि वा आत्महत्या गरि मृत्यु भएको हो ।  यो आँकडामा सबैभन्दा धेरै आत्महत्या गर्नेको सङ्ख्या छ । जिल्लाका विभिन्न स्थानका प्रहरी चौकीबाट प्राप्त जानकारी अनुसार जिल्लामा यो १५ दिनको अवधीमा ६ जनाले आत्महत्या गरेका छन् भने ३ जनाको अन्य कारणले ज्यान गएको छ ।

 जिल्ला प्रहरी कार्यालय खोटाङका अनुसार विगत १५ दिनमा आत्महत्याबाट मर्नेहरूमा केपीलासगढी गाउँपालिकाका १ जना, दिक्तेल रुपाकोट मझुवागढी नगरपालिकाका ३ जना, दिप्रुङ चुइचुम्मा गाउँपालिकाका १ जना र ऐसेलुखर्क गाउँपालिकाका १ जना छन् । यस्तै अन्य कारण मृत्युवरण गर्नेहरुमा केपीलासगढी गाउँपालिकाका १ जना, जन्तेढुंगा गाउँपालिकामा १ जना र बराहपोखरी गाउँपालिकाका १ जना छन् ।

आत्महत्याबाट दिक्तेल रूपाकोट मझुवागढी १ की सुलोचना आचार्य, वडा नम्बर ५ की अरुणा राई र १५ की पृति राई छन् । यस्तै केपीलासगढी गाउँपालिका वडा नम्बर १ का प्रेम विक, दिप्रुङ चुइचुम्मा गाउँपालिका वडा नम्बर ७ का खेमराज मगर र ऐसेलुखर्क गाउँपालिका वडा नम्बर ३ का चित्र बहादुर राजभण्डारी छन् ।  

आत्महत्या गर्नेहरुमा किशोरावस्था देखी बृद्धावस्था सम्मका मानिसहरू छन् ।   जिल्लमा आत्महत्याको आगो सल्किनु ठुलो समस्याको विषय भएको प्रहरीले जानाएको छ ।  व्यक्तिलाई आफ्नो समस्यासँग जुध्न सक्ने क्षमता हराउँदै जानु, मानसिक चिन्ताको व्यवस्थापन गर्न नसक्नु आत्महत्यामा प्रमुख कारणहरू रहेको मनोचिकित्सकहरु बताउँछन् ।

 मानसिक स्वास्थ्यको अवस्थालाई बुझेर समयमै मनोपरार्श वा हौसला प्रदान गर्न सके आत्महत्याको रोकथाम गर्न सकिने मानसिक स्वास्थ्यका अध्यापक रामकृष्ण बोगटीको भनाई छ ।  खोटाङमा पछिल्लो समय आत्महत्याको दर बढीरहेकाले यसको रोकथामका लागी सामाजिक अभियाननै चलाउनुपर्ने पनि विज्ञहरूको भनाई छ ।