‘दसैं–तिहार चेलीलाई उपहार’ अभियानमार्फत खोटाङमा आठ सयभन्दा बढी चेलीलाई सेवा

कार्तिक ९, सोलुखुम्बु । ‘दसैं–तिहार चेलीलाई उपहार’ अभियानअन्तर्गत यस वर्ष आठ सयभन्दा बढी चेलीले निःशुल्क सवारी सेवाबाट लाभ उठाएका छन् । माइती वा मावली जान चाहने चेलीहरूलाई यातायातको अभाव नहोस् भन्ने उद्देश्यले सञ्चालन गरिएको यस अभियानमा तिहारका बेला करिब साढे तीन सय र दसैंका बेला साढे चार सय हाराहारीमा चेलीहरूले सेवा लिएका हुन् ।

अभियानका संयोजक सञ्जयकुमार राईका अनुसार महिला, वृद्ध–वृद्धा, बालबालिका तथा आर्थिक अवस्था कमजोर रहेका व्यक्तिलाई दसैं र तिहारका समयमा निःशुल्क रूपमा माइती र मावली पुर्याउने व्यवस्था गरिएको हो । तिहारमा तीन दिन र दसैंमा चार दिन सञ्चालन गरिएको अभियानमा करिब ६९ जनाले स्वयंसेवकका रूपमा सहभागिता जनाएका थिए । उनीहरूले मोटरसाइकल, एउटा कार र एउटा सुमोमार्फत निःशुल्क यातायात सेवा प्रदान गरेका थिए ।

राईका अनुसार अभियानको पहिलो संस्करण गत वर्ष सञ्चालन गरिएको थियो, जसमा चार सय १५ जनाले सेवा पाएका थिए । यस वर्ष भने सेवाग्राहीको संख्या दोब्बरभन्दा बढी पुगेको छ । उनका अनुसार आगामी वर्षहरूमा यो अभियानलाई अझ प्रभावकारी बनाउँदै देशका अन्य स्थानसम्म विस्तार गर्ने योजना रहेको छ ।