सयपत्री फुल बिक्रीबाट देउसाका किसानलाई करिब ३ लाख ७९ हजार आम्दानी

कार्तिक ९, सोलुखुम्बु । सोलुखुम्बुको थुलुङ दुधकोशी गाउँपालिका–७ देउसाका किसानहरूले यस वर्ष सयपत्री फुल बिक्री गरेर करिब ३ लाख ७९ हजार रुपैयाँ आम्दानी गरेका छन् । वडा कार्यालयले गाउँलाई फुल उत्पादनमा आत्मनिर्भर बनाउने र स्थानीय आम्दानी वृद्धि गर्ने लक्ष्यसहित किसानहरूलाई सयपत्री खेतीतर्फ प्रेरित गरेको हो ।

वडाध्यक्ष भोजराज कार्कीका अनुसार लक्ष्मीपूजा र भाइटीकालाई लक्षित गर्दै कात्तिक १ र ३ गते गाउँपालिकाको कृषि एम्बुलेन्समार्फत १ हजार ८ सय ९५ केजी सयपत्री फुल काठमाडौं पठाइएको थियो ।

फुल बिक्रीको मूल्य प्रति केजी २०० रुपैयाँ तय भएपछि किसानहरूले जम्मा करिब ३ लाख ७९ हजार रुपैयाँ आम्दानी गरेका हुन् । वडाको पहलमा फुल संकलन र माला निर्माणका लागि दाउदाम टोल विकास संस्था मार्फत भोगटे र थुङ्गा फुल, र स्वर्णिम टोल विकास संस्था मार्फत उनिएका माला पठाइएको वडाले जनाएको छ ।

वडाध्यक्ष कार्कीका अनुसार यस वर्षको परीक्षण खेतीले राम्रो नतिजा देखाएको र यसले किसानहरूमा आगामी वर्ष अझ ठूलो परिमाणमा फुल खेती विस्तार गर्ने उत्साह जगाएको छ । गाउँलाई आत्मनिर्भर र समृद्ध बनाउन वडाले यस्ता कृषिआधारित कार्यक्रमलाई निरन्तरता दिने बताइएको छ ।

स्थानीयहरूले पनि सयपत्री खेतीको सुरुवातलाई सकारात्मक रूपमा लिएका छन् । उनीहरूका अनुसार, यसले गाउँमा रोजगारी सिर्जना गर्नुका साथै आम्दानी वृद्धि र आत्मगौरवको भावना जगाएको छ । वडाले बिक्रीबाट प्राप्त रकम किसानहरूलाई वितरण गरिरहेको जनाएको छ ।