कार्तिक ९, सोलुखुम्बु । सोलुखुम्बुको थुलुङ दुधकोशी गाउँपालिका–१ नेलेदेखि वडा नम्बर ७ भित्र पर्ने मुख्य सडक खण्डका विभिन्न स्थानमा सडकको संरचनामा क्षति पुग्ने र सवारीसाधन आवागमनमा समेत प्रत्यक्ष असर पर्ने गरी काठ राखिएको पाइएको छ । यस सम्बन्धमा स्थानीय बासिन्दा र सवारी चालकहरूबाट व्यापक गुनासो आएपछि गाउँपालिकाले यस विषयमा गम्भीर ध्यानाकर्षण जनाएको छ ।
वडा नम्बर ७ का अध्यक्ष भोजराज कार्कीले व्यवसायीहरूलाई तीन दिनभित्र सडकमा राखिएका काठ व्यवस्थापन गरी सवारी आवागमन सहज बनाउन निर्देशन दिनुभएको छ । उहाँले तोकिएको समयसीमा भित्र काठ हटाइएमा समस्या समाधान हुने बताउँदै, यदि बेवास्ता गरी निर्धारित समयभित्र पनि काठ हटाइएको नपाइएमा सम्बन्धित व्यवसायीविरुद्ध प्रचलित कानुन अनुसार कारबाही गरिने चेतावनी दिनुभयो ।
स्थानीयहरूका अनुसार सडकमा अनियमित रूपमा काठ थुपारिँदा सवारी सञ्चालनमा समस्या हुने, दुर्घटनाको जोखिम बढ्ने र यात्रुहरूलाई समेत असुविधा हुने अवस्था सिर्जना भएको छ ।
Discussion about this post