थुलुङ दुधकोशीमा बृहत् स्वास्थ्य शिविरको तयारी सुरु

कार्तिक २०, सोलुखुम्बु । सोलुखुम्बुको थुलुङ दुधकोशी गाउँपालिकामा आगामी कार्तिक २२ गतेदेखि सञ्चालन हुने बृहत् स्वास्थ्य शिविरको तयारी सुरु गरिएको छ । गाउँपालिकाको समन्वय र एग्रिकल्चर एड एशोसिएसनको आयोजनामा तथा कादुरी बीजीएनको प्राविधिक सहयोगमा हुने उक्त शिविरका लागि आवश्यक तयारी तीव्र पारिएको गाउँपालिका अध्यक्ष असिम राईले जानकारी दिनुभयो ।

उहाँका अनुसार स्वास्थ्य शिविर कार्तिक २२ गतेदेखि २५ गतेसम्म गाउँपालिकाको मुक्लिस्थित विरेन्द्रोदय माध्यमिक विद्यालयमा सञ्चालन गरिनेछ । शिविरमा स्थानीय बासिन्दाहरूलाई विभिन्न स्वास्थ्य सेवा निःशुल्क रूपमा उपलब्ध गराइनेछ । शिविरमा स्त्रीरोग सम्बन्धी जाँच तथा उपचार, आँखा परीक्षण र मोतिबिन्दु शल्यक्रिया, दाँत उपचार तथा आवश्यक परे दाँत झिक्ने सेवा, साथै रगत, पिसाब, मुटुको ईसीजी, भिडियो एक्स–रे लगायतका परीक्षणहरू निःशुल्क गरिने व्यवस्था गरिएको छ ।

उपचारपछि आवश्यक औषधिहरू समेत निःशुल्क वितरण गरिनेछ । मोतिबिन्दु शल्यक्रिया गराइएका बिरामीका लागि खानाबास तथा ओड्ने–ओछ्याउने व्यवस्था भने स्वयम् बिरामीले गर्नुपर्ने आयोजकले जनाएको छ । त्यस्तै, शिविरमा कादुरीद्वारा सञ्चालित विभिन्न निःशुल्क सिपमूलक तालिमहरूबारे परामर्श, छनोट तथा सहजीकरण समेत गराइनेछ ।

गाउँपालिकाले स्थानीय बासिन्दालाई यस स्वास्थ्य शिविरबाट अधिकतम लाभ लिन उपस्थित हुन आग्रह गरेको छ । गाउँपालिकाका अनुसार तयारी कार्य तीव्र गतिमा अघि बढाइएको छ भने सबै आवश्यक समन्वय पूरा गर्न लागेको जनाइएको छ ।