सोलुखुम्बुमा थपिए २९१ नयाँ मतदाता

कार्तिक २३, सोलुखुम्बु । सोलुखुम्बुमा मतदाता नामावली दर्तामा हालसम्म २ सय ९१ जना नयाँ मतदाता थपिएका छन् । निर्वाचन आयोगले सञ्चालन गरिरहेको मतदाता नामावली दर्तामा जिल्लाभर १ सय ७३ जना पुरुष र ११८ जना महिलाले फोटोसहितको मतदाता दर्ता गराएका हुन् । जिल्ला निर्वाचन कार्यालय सोलुखुम्बुका प्रमुख नेत्र घिमिरेका अनुसार दैनिक करिब १० देखि ११ जनासम्मले आफ्नो नाम दर्ता गराइरहेका छन् ।

२०८१ साल असोज मसान्तसम्म सोलुखुम्बुमा मतदाताको संख्या ८२ हजार ८ सय ५४ रहेको थियो । आयोगबाट २०८२ सालभरिको मतदाता संख्या प्रकाशन हुन बाँकी भए पनि यस जिल्लाको मतदाता संख्या थप वृद्धि हुने अनुमान गरिएको छ ।

निर्वाचन आयोगका अनुसार फोटोसहितको मतदाता अद्यावधिक दर्ता कार्य आगामी २०८२ साल कार्तिक ३० गतेसम्म मात्र सञ्चालन हुनेछ। जिल्ला निर्वाचन कार्यालयले सेवाग्राहीलाई सहज सेवा प्रदान गर्न कार्यालयमा निरन्तर सेवा प्रवाह भइरहेको जनाएको छ ।