कोशी साहित्य–कला परिषद् नेपालद्वारा सल्लाहकार समिति गठन

समाचारदाताः मनोज कार्की, मोरङ – कार्तिक २३ । भाषा, साहित्य, कला र संस्कृतिको प्रवद्र्धन गर्ने उद्देश्यले हालै स्थापना भएको संस्था ‘कोशी साहित्य–कला परिषद् नेपाल’ ले आफ्नो पहिलो बैठक सम्पन्न गरी सल्लाहकार समिति गठन गरेको छ । शनिबार बेलबारीमा सम्पन्न उक्त बैठकले संविधानसभा सदस्य तथा साहित्यकार हर्कमान तामाङको संयोजनमा पाँच सदस्यीय सल्लाहकार समिति गठन गरेको हो।

सल्लाहकार समितिमा प्रा.डा. भीम खतिवडा (नेपाल संस्कृत विश्वविद्यालय, निवर्तमान शिक्षाध्यक्ष, सुनसरी), डा. छवि वैरागी घिमिरे (मोरङ), वरिष्ठ स्रष्टा केशव आचार्य (झापा) र कवि तथा समीक्षक मिश्र बैजयन्ती (मोरङ) सदस्य रहनुभएको छ । संस्थाका सचिव नवराज पोखरेल ‘नवशिला’ का अनुसार आवश्यकतानुसार थप सल्लाहकार सदस्य मनोनयन गर्ने निर्णय समेत बैठकले गरेको छ ।

साथै, संस्थापक सदस्यहरूको निर्धारण र वार्षिक कार्ययोजना पनि बैठकले पारित गरेको छ । परिषद्ले भाषा, साहित्य र कला–संस्कृति सम्बन्धी तीन विभाग स्थापना गर्दै हरेक विभागमा संयोजक तोकेको छ । भाषा विभागः वासु अधिकारी (मोरङ), साहित्य विभागः रोमु अधिकारी (सुनसरी) कला तथा संस्कृति विभागः राज यात्री लम्साल (मोरङ) रहनुभएको छ ।

हरेक विभागमा ११ जना सदस्य मनोनयन गरिएको परिषद्ले जनाएको छ । अध्यक्ष विरही का अनुसार परिषद्ले निकट भविष्यमा प्रकाशन, पुस्तक लोकार्पण र साहित्यिक विमर्श लगायतका कार्यक्रम आयोजना गर्ने योजना तयार गरेको छ ।