लिखु पिके गाउँपालिकाको प्रमुख प्रशासकीय भवनको शिलन्यास

कार्तिक २४, सोलुखुम्बु । लिखुपिके गाउँपालिकाको प्रशासकीय भवन निर्माण हुने भएको छ । सोमबार सो भवनको एक कार्यक्रमबीच शिलान्यास गरिएको हो । गाउँपालिका अध्यक्ष मिना कार्की बस्नेतका अनुसार, भवन निर्माणका लागि २०८२ साल असोज २८ गते लिखु पिके गाउँपालिका र रामेछाप–जिरी जे.भी. निर्माण सेवा कम्पनीबीच सम्झौता गरिएको थियो ।

सम्झौता अनुसार भवन निर्माणको कुल लागत ८ करोड ३२ लाख ४६ हजार ५८९ रुपैयाँ (मूल्य अभिवृद्धि कर तथा पी.एस. सहित) तय गरिएको छ । निर्माण कम्पनीले १८ महिनाभित्र भवन निर्माण कार्य सम्पन्न गर्नुपर्नेछ । तीन तले आधुनिक संरचनामा निर्माण हुने यो भवनले गाउँपालिकाको प्रशासनिक कामकाजलाई व्यवस्थित, प्रभावकारी र सहज बनाउन सहयोग पुर्याउने अपेक्षा गरिएको छ ।

गाउँपालिका अध्यक्ष बस्नेतले भवन निर्माण सम्पन्न भएपछि सेवाप्रवाह अझ सहज, गुणस्तरीय र प्रभावकारी हुने बताउनुभयो । नयाँ प्रशासनिक भवनको निर्माणले गाउँपालिकाको कार्यसञ्चालनमा आधुनिकता थप्ने र स्थानीय तहको सुशासन सुदृढ गर्न महत्वपूर्ण योगदान पुर्याउने विश्वास गरिएको छ ।