८८ प्रतिशत वित्तीय प्रगति सहित सोलुखुम्बु जिल्ला सभाको पाँचौं अधिवेशन सम्पन्न

कार्तिक २६, सोलुखुम्बु । जिल्ला समन्वय समिति सोलुखुम्बुको पाँचौं जिल्ला सभाको बैठक सम्पन्न भएको छ । आज जिल्ला समन्वय समितिका प्रमुख कृष्ण प्रसाद निरौलाको अध्यक्षतामा सम्पन्न भएको उक्त बैठक सम्पन्न भएको होे । बैठक कोशी प्रदेशको जिल्ला सभा कार्यसञ्चालन ऐन, २०७५ को दफा ३ बमोजिम आव्हान गरिएको थियो । बैठकमा जिल्ला समन्वय समिति कार्यालय सोलुखुम्बुले आर्थिक वर्ष २०८१/८२ को वार्षिक कार्यसम्पादन प्रतिवेदन, आय–व्यय विवरण, मौज्दात कोषबाट सञ्चालित योजनाहरू, आगामी वर्षको कार्ययोजना तथा चालु आर्थिक वर्ष २०८२/८३ का लागि प्रस्तावित बजेट लगायतका विषयमा छलफल गरी निर्णय गरेको छ ।

जिल्ला समन्वय समितिको वार्षिक प्रतिवेदनमा आर्थिक वर्ष २०८१/८२ मा नियमित बोर्ड बैठक १० पटक, विभिन्न निकायका बैठकमा २४ पटक सहभागिता, २४ वटा योजना तथा कार्यक्रमको अनुगमन लगायतका कार्य सम्पन्न गरिएको उल्लेख छ । त्यसका साथै कार्यालय भवन मर्मत, अभिलेख व्यवस्थापन, सदस्यहरूको कार्यक्षेत्र निर्धारण तथा मासिक प्रतिवेदन प्रणालीको थालनी लगायतका रचनात्मक पहलहरू गरिएको जानकारी प्रतिवेदनमा समावेश गरिएको छ । यस्तै जिल्ला सभा बैठकमा आर्थिक वर्ष २०८१/८२ को आय–व्यय प्रतिवेदन प्रस्तुत गर्दै जिसस सदस्य सोमराज केसीले कुल २१,९२४,७८८ बजेटमध्ये १९,२६१,५६१ खर्च भई समग्र वित्तीय प्रगति ८८ प्रतिशत पुगेको जानकारी गराउनुभएको छ ।

नेपाल सरकारबाट प्राप्त सशर्त चालु अनुदान, उपदान, सञ्चित बिदा र सेवा निवृत्त औषधि उपचार शीर्षकका खर्चहरू नियमानुसार सम्पन्न भएको जनाइएको छ । यस्तै आर्थिक वर्ष २०८२/८३ का लागि नेपाल सरकारबाट प्राप्त १ करोड ६८ लाख ६२ हजार बजेटलाई बिभिन्न शीर्षकमा बाँडफाँट गर्ने प्रस्ताव सभामा पेश गरिएको थियो । सो बजेटमा जनप्रतिनिधि तथा कर्मचारीको पारिश्रमिक, कार्यालय सञ्चालन खर्च, कार्यक्रम खर्च, अनुगमन मूल्याङ्कन र भ्रमण खर्च लगायतका शीर्षक समावेश छन् ।

छलफलपछि सभाका अध्यक्ष तथा जिल्ला समन्वय समितिका प्रमुख कृष्ण प्रसाद निरौलाले सभामा उठाइएका सुझाव र टिप्पणीलाई आगामी कार्यसम्पादनमा मार्गदर्शनको रूपमा ग्रहण गर्ने प्रतिबद्धता व्यक्त गर्दै बैठक समापन गर्नुभएको छ । उहाँले जिल्लाका स्थानीय तहहरूबीच समन्वय, अनुगमन र सहकार्यलाई अझ प्रभावकारी बनाउन समिति प्रतिबद्ध रहेको बताउनुभयो ।

बैठकमा रोयल्टी बाँडफाँट सम्बन्धी प्रस्ताव लगायत विविध विषयमा पनि छलफल भएको थियो । बैठकमा सोलुदुधकुण्ड नगरपालिकाका प्रमुख–उपप्रमुख, थुलुङ दुधकोशी, सोताङ, लिखुपिके, नेचासल्यान गाउँपालिकाका उपाध्यक्ष, जिल्ला समन्वय समितिका उपप्रमुख तथा सदस्यहरूको उपस्थिति रहेको थियो ।