वनभाडेमा सम्पन्न सुनुवाइमा कम्पनी र स्थानीयबीच सहमति, पानी स्रोतमा असर परे जिम्मेवारी लिने प्रतिवद्धता

कार्तिक २७, सोलुखुम्बु । हिमालयन एभरेष्ट वाटर प्रा.लि.को प्रारम्भिक वातावरणीय परीक्षण सम्बन्धी सार्वजनिक सुनुवाइ सम्पन्न भएको छ । सार्वजनिक सुनुवाइ कार्यक्रम सोलुदुधकुण्ड नगरपालिका–८ र ११ को सिमानास्थित वनभाडेमा सम्पन्न भएको हो।

कार्यक्रममा कम्पनीले प्रस्तावित उद्योग सञ्चालनका क्रममा स्थानीय पानी स्रोतमा कुनै पनि नकारात्मक असर नपर्ने प्रतिबद्धता जनाएको छ । साथै, भविष्यमा पानी स्रोत प्रभावित भएमा त्यसको सम्पूर्ण जिम्मेवारी कम्पनीले लिने र पानीको उपलब्धता सुनिश्चित गर्ने सहमति पनि भएको छ । सार्वजनिक सुनुवाइमा सहभागी स्थानीय सरोकारवालाहरूले उद्योगबाट प्राप्त हुने रोयल्टी तथा सामाजिक उत्तरदायित्व अन्तर्गतका कार्यक्रमहरू प्रभावित क्षेत्रका शिक्षा, स्वास्थ्य, आर्थिक, सामाजिक तथा पूर्वाधार विकासका क्षेत्रमा प्राथमिकता दिई उपयोग गर्नुपर्ने प्रस्ताव राखिएको छ ।

उक्त प्रस्ताव सर्वसम्मतिपूर्वक पारित गरिएको जनाइएको छ । सुनुवाइ कार्यक्रममा बोल्दै सोलुदुधकुण्ड नगरपालिकाका मेयर नाम्गेल जाङ्बु शेर्पाले यो ऐतिहासिक सार्वजनिक सुनुवाइले स्थानीय सरकार, सरोकारवालाहरू र समुदायबीच सहकार्य र समन्वयको माध्यमबाट दिगो विकासको मार्ग प्रशस्त गरेको बताउनुभयो ।

उहाँका अनुसार यो पहल सोलुदुधकुण्ड मात्र नभई सम्पूर्ण सोलुखुम्बु जिल्लाका लागि पनि महत्वपूर्ण उपलब्धि हो । उक्त कार्यक्रममा स्थानीय प्रतिनिधि, सरोकारवाला निकायका प्रतिनिधि, सामाजिक अभियन्ता र समुदायका सदस्यहरूको सक्रिय उपस्थिती रहेको थियो ।