टिकटक लाइभबाट संकलन गरिएको लागत र नगरपालिकाको सहकार्यमा बन्ने बुद्ध पार्कको शिलान्यास

कार्तिक २९, सोलुखुम्बु । सोलुखुम्बुको सोलुदुधकुण्ड नगरपालिका–१०, टाप्टिङ फोक्टेडाँडामा निर्माण हुन लागेको बुद्ध पार्कको शिलान्यास गरिएको छ । समुद्री सतहदेखि २९०० मिटर उचाइमा बन्ने यो महत्वाकांक्षी परियोजना टिकटक लाइभमार्फत संकलित रकम र नगरपालिकाको सहकार्यमा अघि बढाइएको हो ।

यस परियोजनामा सोलुदुधकुण्ड नगरपालिकाबाट १० लाख र सेभेन समिट फाउन्डेसनबाट ५५ लाख गरी कुल ६५ लाख लागतमा गरिएको गरिने भएको छ । शिलान्यास कार्यक्रममा बोल्दै नगरप्रमुख शेर्पाले टाप्टिङ क्षेत्रको धार्मिक, पर्यटकीय तथा वातावरणीय महत्व बढाउने उद्देश्यले बुद्ध पार्क निर्माण थालिएको उल्लेख गर्नुभयो ।

सेभेन समिट फाउन्डेसनका प्रमुख एसी शेर्पाले टिकटक लाइभमार्फत ५ मिनेटमै ४० लाखभन्दा बढी रकम संकलन भएको र सोही बजेट पार्क निर्माणमा उपयोग गरिने जानकारी दिनुभयो । उहाँले उच्च पहाडी क्षेत्रको प्राकृतिक सुन्दरतासँग जोडिएको यो पार्क भविष्यमा राष्ट्रिय तथा अन्तर्राष्ट्रिय पर्यटककै आकर्षण बन्न सक्ने विश्वास समेत व्यक्त गर्नुभएको छ । यस्तै वडा अध्यक्ष होम बहादुर मगरले बुद्ध पार्कले टाप्टिङ क्षेत्रको समग्र विकासमा नयाँ आयाम थप्ने विश्वास व्यक्त गर्नुभयो ।