कार्तिक २९, सोलुखुम्बु । प्रतिगामी षड्यन्त्रविरुद्धको जनपरिचालन अभियानअन्तर्गत नेकपा (एमाले) सोलुखुम्बु जिल्ला कमिटीले आज सदरमुकाममा मोटरसाइकल र्याली गरेको छ । देशभरका ७७ जिल्लामा आयोजित जनसभासँगै सोलुखुम्बुमा पनि मोटरसाइकल र्याली गरिएको हो ।
कार्यक्रममा प्रतिनिधि सभा पुनःस्थापना गर्ने, भदौ २३–२४ का जेनजी आन्दोलनका क्रममा भएका अपराधिक घटनाको छानबिन, साथै तोडफोड तथा लुटपाटमा संलग्नहरूलाई कारबाही गर्नुपर्ने माग प्रमुख रूपमा उठाइएको थियो । र्यालीलाई सम्बोधन गर्दै नेकपा एमाले प्रदेश सभा सदस्य बुद्धिकुमार राजभण्डारीले प्रतिनिधि सभा पुनःस्थापना नै पार्टीको मुख्य एजेण्डा रहेको बताउनुभयो ।
उहाँले वर्तमान राजनीतिक अवस्थाको समाधान संसद् पुनःस्थापनाबाट मात्र सम्भव हुने धारणा राख्नुभयो । यस्तै जिल्ला कमिटीका अध्यक्ष डुफकुमार बास्तोलाले जेनजीहरूको माग जायज रहेको उल्लेख गर्दै ती माग सम्बोधनका लागि प्रतिनिधि सभा पुनःस्थापना अपरिहार्य भएको बताउनुभयो । यसअघि पार्टीले कात्तिक २५ गते देशभरका स्थानीय तहमा प्रदर्शन र सभा गरेको थियो । आगामी मङ्सिर ६ गते काठमाडौंमा विशाल जनसभा गर्ने एमालेको घोषणा छ ।
प्रतिनिधिसभा विघटनलाई असंवैधानिक ठान्दै आएको एमालेले मङ्सिर २ गतेका लागि विघटित प्रतिनिधिसभा दलको बैठकसमेत बोलाएको छ, जसमा संसद् पुनःस्थापना लगायत समसामयिक राजनीतिक विषयमा थप रणनीति तय गरिने बताइएको छ । उता सरकारले भने फागुन २१ गतेका लागि चुनाव घोषणा गरिसकेको छ । एमालेले प्रधानमन्त्री नियुक्ति र प्रतिनिधिसभा विघटन दुवैलाई असंवैधानिक दाबी गर्दै आन्दोलन जारी राखेको छ ।
Discussion about this post