८२ हाइड्रोको शेयर निष्कासन : काठमाडौंमा बन्यो संघर्ष समिति

कार्तिक २९, सोलुखुम्बु । सोलु हाईड्रोपावरले आगामी मंसिर ७ गतेदेखि आईपीओ निष्कासन गर्ने तयारी गरिरहेकै बेला नेचासल्यान क्षेत्रका स्थानीयले काठमाडौंमा २९ सदस्यीय संघर्ष समिति गठन गरी शेयर निष्कासन तत्काल स्थगन गर्न दबाब दिइरहेका छन् ।

संघर्ष समितिले नेपाल धितोपत्र बोर्ड, कम्पनीको केन्द्रीय कार्यालय तथा जिल्ला प्रशासन कार्यालय सोलुखुम्बुमा ज्ञापनपत्र बुझाउने निर्णय गरेको छ । समितिको भनाइअनुसार आयोजनाको निर्माणका क्रममा खाल्पा, सल्यान, सहेले, चुर्पुघाट हुँदै तुइनटार क्षेत्रको सोलु खोलालाई माथिल्लो भागबाट पथान्तर गरिनु र हाल खोला न्यून बहावका साथ बग्नुले स्थानीय बासिन्दा, जलचर र वनस्पतिमा प्रत्यक्ष असर पारेको छ । यसैबीच कम्पनीले १० अर्ब रुपैयाँ जारी पुँजीमध्ये २० प्रतिशत अर्थात २ करोड कित्ता शेयर निष्कासन गर्न अनुमति पाएको छ ।

त्यसमध्ये १ करोड कित्ता आयोजना प्रभावित स्थानीयका लागि छुट्याइएको छ । ४० लाख कित्ता सोलु दूधकुण्ड–७ र ११ तथा थुलुङ दूधकोशी–१ का अति प्रभावित बासिन्दाका लागि तोकिएको छ भने ६० लाख कित्ता अन्य वडाका स्थानीयका लागि रहनेछ । वैदेशिक रोजगारमा रहेका नेपालीका लागि सर्वसाधारण भागबाट १० प्रतिशत अर्थात १० लाख कित्ता छुट्याइएको छ।

प्रभावित क्षेत्रमा मंसिर २१ देखि पुस ७ सम्म र विदेशमा रहेका नेपालीका लागि मंसिर १० देखि २१ सम्म आवेदन खुला रहनेछ । स्थानियले प्रभावित क्षेत्र पहिचानमा पटक–पटक प्रश्न उठाउँदै आइरहेका छन् ।