मुक्लिमा सांस्कृतिक धमाका : प्रमोद, कृष्ण र बबिना किराँतीको बेजोड प्रस्तुति

कार्तिक ३०, सोलुखुम्बु । सोलुखुम्बुको थुलुङ दुधकोशी गाउँपालिका–मुक्लिमा मंसिर ५ गतेदेखि सुरु हुने तीनदिने भव्य महोत्सवका लागि तयारी तीव्र बनाइएको छ । गाउँपालिकाको आयोजनामा हुन लागेको सातौं अध्यक्ष रनिङ शिल्ड प्रतियोगिता तथा विशेष सांस्कृतिक महोत्सवलाई यस वर्ष थप आकर्षक बनाइने आयोजकले जनाएको छ ।

गाउँपालिका अध्यक्ष असिम राईको अध्यक्षतामा बसेको कार्यपालिका बैठकले मंसिर ५, ६ र ७ गते भव्य महोत्सव आयोजना गर्ने निर्णय गरेको हो। महोत्सवको पहिलो दिन, विशेष सांस्कृतिक साँझमा प्रसिद्ध गायक प्रमोद खरेल एण्ड परम्परा ब्याण्ड, ‘इन्द्रेणी’ कार्यक्रमका लोकप्रिय सञ्चालक तथा लोकगायक कृष्ण कँडेल र विश्व कीर्तिमानी गायिका बबिना किराँतीको दमदार प्रस्तुति हुने छ । दोस्रो दिन मंसिर ६ गते साँझ पनि आकर्षक सांस्कृतिक प्रस्तुति रहनेछ । यस दिन ‘भोइस अफ नेपाल सिजन ५’ का फाइनलिस्ट कुमार प्रयास, स्थानीय कलाकार कृष्ण राई, हास्यकलाकार विनोद बाबु भण्डारी, साथै सुविध्या राई र महेश बाबु सुन्दास्ले प्रस्तुति दिने कार्यक्रम रहेको संयोजक पक्षले बताएको छ ।

केवल मनोरञ्जनमै सीमित नरहने महोत्सवमा खेलकुद र कृषि क्षेत्रलाई विशेष प्राथमिकता दिइएको छ। ६ नं. वडा अध्यक्ष तथा सांस्कृतिक कार्यक्रम संयोजक महेन्द्रदीप राईका अनुसार महोत्सवमा महिला तथा पुरुष भलिबल, टेबल टेनिस, ब्याडमिन्टन लगायतका प्रतिस्पर्धात्मक खेलहरू आयोजना गरिने छन्। साथै, वृहत् कृषि मेला तथा प्रदर्शनी, स्थानीय समुदायका विशेष खानाका ‘इस्टल’ तथा अन्य विविध कार्यक्रम पनि समावेश गरिनेछ ।

गाउँपालिकाले यस वर्षको महोत्सवलाई खेलकुदको विकास, स्थानीय कलाकारको सम्मान, कला–संस्कृति संरक्षण, साथै आन्तरिक पर्यटन प्रवद्र्धनमा महत्वपूर्ण योगदान पु¥याउने उद्देश्यका साथ तयारी गरिरहेको जनाएको छ। खेलाडी र स्थानीय उत्पादनलाई प्रोत्साहन गर्न उचित पुरस्कारको व्यवस्था समेत गरिएको छ । महोत्सवको तयारी तथा व्यवस्थापनलाई प्रभावकारी बनाउन गाउँपालिका उपाध्यक्ष सविता राईको संयोजकत्वमा तयारी समिति गठन गरिएको छ। आयोजकले महोत्सवलाई ऐतिहासिक र भव्य बनाउन सबै स्थानीय समुदाय तथा सरोकारवालाको सहकार्य अपेक्षा गरेको छ ।