सोताङ गाउँपालिकाको माग : सोलु हाइड्रोपावरको प्रभावित क्षेत्र निर्धारण पुनः संशोधन गर्न दबाब

मंसिर २, सोलुखुम्बु । सोलुखुम्बुको सोताङ गाउँपालिकाले सोलु हाइड्रोपावर कम्पनीद्वारा ८२ मेगावाटको परियोजनाका लागि नेपाल धितोपत्र बोर्डमार्फत कार्तिक २७ गते प्रकाशित सूचना अन्यायपूर्ण भएको आरोप लगाउँदै उक्त निर्णय तत्काल सच्याउन माग गरेको छ । गाउँपालिकाले जारी गरेको प्रेस विज्ञप्तीमा कम्पनीले प्रभावित क्षेत्र तोक्दा सोलुखुम्बुको सीमित भूभागलाई मात्र समेटेर अन्यायपूर्ण ढंगले शेयर वितरणको दायरा निर्धारण गरेको बताइएको छ ।

कार्तिक ३० गते बसेको गाउँकार्यपालिका बैठकको सर्वसम्मत निर्णय उद्धृत गर्दै अध्यक्ष खिलराज बस्नेतले विगतका हाइड्रोपावर परियोजनाहरूले सिंगो सोलुखुम्बु जिल्लालाई नै प्रभावित क्षेत्र मानेर सर्वसाधारणलाई आईपिओ आवेदन दिन अनुमति दिएको उदाहरण स्मरण गराएका छन् । विज्ञप्तीमा नेचासल्यान गाउँपालिकालाई परियोजनाबाट प्रत्यक्ष असर पर्ने क्षेत्र तथा वातावरणीय प्रभाव सिंगो जिल्लाका भूभागमा पर्ने भएकाले सबै स्थानीयवासीलाई प्रभावित क्षेत्रका रुपमा समावेश गर्नुपर्ने माग राखिएको छ ।

हाल सोलु हाइड्रोपावर कम्पनीले अत्यन्त सीमित क्षेत्रलाई मात्र प्रभावित घोषणा गरेको भन्दै सोताङ गाउँपालिकाले विरोध जनाएको हो । गाउँपालिकाले सोलु हाइड्रोपावर कम्पनी, नेपाल धितोपत्र बोर्ड तथा समन्वयकारी भूमिकामा रहने जिल्ला प्रशासन कार्यालय सल्लेरीलाई निर्णय संशोधन गरी पुनः सूचना प्रकाशित गर्न माग गरेको छ ।

प्रेस विज्ञप्तीमा प्रभावित क्षेत्र निर्धारणमा पारदर्शिता, समानता र जिल्लाका सबै नागरिकको हकहित सुनिश्चित गर्नुपर्नेमा जोड दिइएको छ । सोलुखुम्बुका स्थानीय तहहरूले हाइड्रोपावरलगायतका ठूला परियोजनामा ‘प्रत्याभूति दिने क्षेत्रमा समान अवसर’ को माग गर्दै आएका बेला सोताङ गाउँपालिकाको यस कदमलाई जिल्लाभरि चासोका साथ हेरिएको छ ।